Celaá diz tener «un respetu grande» pol asturianu, pero va esperar a la oficialidá p'aprobar la especialidá docente

La ministra d'Educación y Formación Profesional recordó amás que «les necesidaes o demandes» de clases n'asturianu «tán cubiertes»

La consejera de Educación de Asturias, Carmen Suárez, y la ministra de Educación y FP, Isabel Celaá, tras reunirse este miércoles en Madrid.
La consejera de Educación de Asturias, Carmen Suárez, y la ministra de Educación y FP, Isabel Celaá, tras reunirse este miércoles en Madrid.

La ministra d'Educación y Formación Profesional, Isabel Celaá, manifestó que tien «un respetu grande» pol asturianu como «por toles llingües del Estáu», pero'l so Ministeriu va esperar a que se convierta en llingua oficial pa convertir les sos enseñances n'especialidá docente, dalgo qu'esixe un cambiu de los reales decretos d'especialidaes n'educación. Celaá recordó amás que «les necesidaes o demandes» de clases n'asturianu «tán cubiertes», como declaró a los medios depués d'aconceyar esti miércoles cola conseyera d'Educación d'Asturies, Carmen Suárez, na sede del Ministeriu en Madrid.

Suárez confirmó qu'esta foi una de les cuestiones que trató con Celaá nuna xunta que s'allargó hora y media, y que s'enmarca na ronda d'alcuentros que Celaá ta calteniendo estes selmanes colos conseyeros d'Educación de les comunidaes autónomes. «Falamos del asturianu porque ye una llingua propia en situación normalizada dientro del sistema educativu, onde existe la enseñanza del asturianu en Primaria y Secundaria con caracter xeneral siempre qu'exista la volunta de les families de tenela», dixo Suárez.

La conseyera asturiana recordó que «ta pendiente» que sía llingua oficial n'Asturies, y si se produz esa situación van poder tratase aspectos como la especialidá y la ufierta de places a docentes nes mesmes condiciones qu'otres especialidaes educatives. «Esperamos que pueda dir tratándose dientro d'un contestu d'estudiu, analís y consideración sobre cómo va ser nel futuru d'Asturies, pero les enseñances n'asturianu yá tienen el so propiu currículum y profesoráu contratáu cuando existe esa necesidá», añadió la conseyera Suárez, según informa Europa Press.

Comentarios

Celaá diz tener «un respetu grande» pol asturianu, pero va esperar a la oficialidá p'aprobar la especialidá docente

Cola ayuda de