Reabiertes al públicu les cueves d'El Pozu'l Ramu y El Pindal, el castru de Cuaña y l'ídolu de Peña Tu
ACTUALIDÁ
La reapertura ye una vez que pudieron cumplir los protocolos que garanticen la seguridá de trabayadores y usuarios
10 jun 2020 . Actualizado a las 17:14 h.La conseyera de Cultura, Política Llingüística y Turismu, Berta Piñán, visitó esti miércoles la cueva d'El Pindal, en Pimiango, pola so reapertura al públicu. Dende güei tamién se puen facer visites a la cueva d'El Pozu'l Ramu, La Cuevona, el castru de Cuaña y l'Ídolu de Peña Tu.
Piñán, que tuvo acompañada pol director xeneral de Cultura y Patrimoniu, Pablo León, y pol alcalde de Ribedeva, Jesús Bordás, recordó que la reapertura de les cueves con arte rupestre ye una vez que pudieron cumplir los protocolos que garanticen la seguridá de trabayadores y usuarios. Na so visita la conseyera de Cultura valoró la importancia del Documentu Técnicu pa cueves, xacimientos arqueolóxicos y monumentos, publicáu como ferramienta pa salvaguardar la vuelta a l'actividá de los xacimientos rupestres.
El trabayu, integráu na web que'l Gobiernu d'Asturies caltién abierta pa informar sobre la crisis, ye'l más complementáu de los preparaos a nivel nacional no referente a xacimientos rupestres. Les cueves afixeron les turnos y los pases a les midíes de salvaguarda y protección énte la emerxencia sanitaria. Asina, n'El Pozu'l Ramu almítense 5 persones por visita y la cueva rioseyana va tener cinco pases, dende les 11:00 hasta les 17:00 hores. El Pindal tamién amenorga a grupos de 5 persones les visites y va ufiertar trés pases a partir de les 10:30 hores y cada 90 minutos.
L'Ídolu de Peña Tu abre de 10:00 a 17:00 hores y va tener pase llibre siguiendo les instrucciones del vixilante. El castru de Cuaña, qu'ufre serviciu ente les 10:30 y les 17:30 hores, almite un máximu de 20 visitantes, y de 10 persones nes visites guiaes; y la Cuevona, qu'abre a les 10.15 hores, ufierta dos pases fixos a les 11:45 y a les 16:15 hores, con cinco persones máximu, informa Europa Press.