Según confirmó'l Grupo Riesgo, les fábriques van poder acelerar de manera significativa tanto la producción como les ventes
07 jul 2020 . Actualizado a las 18:19 h.La directiva d'Alú Ibérica anunció qu'algamó un alcuerdu de comercialización col grupu luxemburgués Traxys. «Esti alcuerdu súmase al proyectu de futuru pa les plantes d'Avilés y A Coruña, non namás nel ámbitu español, sinón tamién a nivel global, reforciando la estratexa comercial y ameyorando la eficiencia y rentabilidá de les plantes de producción», indicó la entidá.
Según confirmó'l Grupo Riesgo, esti alcuerdu con Traxys va ufrir ferramientes de comercialización y va formar parte del departamentu na operativa diaria, ayudando al desarrollu y comercialización del productu. Coles mesmes, va asesorar sobre operaciones, identificación de mercaos, evaluación de riesgos o internacionalización del productu. D'esta manera, les fábriques van poder acelerar de manera significativa tanto la producción como les ventes, colo que va consiguir «una eficiencia mayor y un primer pasu pa desenvolver la espansión internacional».
Traxys ye un trader y distribuidor de materies primes, especializáu nel sector de la metalurxa. Les sos actividaes de loxística, comercialización, distribución, xestión de la cadena de suministru y trading suponen el trabayu de más de 400 empleaos repartíos en más de los sos 20 oficines a nivel mundial, llogrando una facturación anual que supera los 6.000 millones de dólares, informa Europa Press.