Siero inaugura la pintura fecha na fachada d'un edificiu de Llugones pol artista lleonés David Esteban «Dados punto cero»
24 jul 2020 . Actualizado a las 05:00 h.Un mural de 150 metros cuadraos recuerda a los habitantes y a los visitantes de Llugones la importancia de reciclar los residuos. La pintura, fecha pol artista lleonés David Esteban «Dados punto cero», puede vese nún de los edificios de la cai Antonio Machado y, según esplicaron dende'l conceyu, va ser la primera d'una serie d'actuaciones coles que l'equipu de Gobiernu pretende camudar la estética de la localidá.
L'alcalde de Siero, Ángel García, foi l'encargáu d'inaugurar la obra. El mural, de 15 metros d'altu por 10 d'anchu, resalta la importancia de reciclar y de reutilizar los residuos. La imaxe representa a una neña, nesti casu la fía del artista, que reutiliza un brick de lleche y conviértelu nun avión de xuguete. El pintor tardó trés selmanes en completar el so trabayu.
El primer conceyal anunció que yá intentaren va años facer un mural, pero nel so día l'artista «fallónos». «Nesta ocasión contactamos con David, al que quiero dar les gracies pola seriedá amosada y pol trabayu realizáu», afirmó García.
Tres l'ésitu y la gran acoyida que tuvo'l mural ente los vecinos de Llugones, el Conceyu de Siero busca yá otres llocalizaciones pa pintar obres nueves. «Lo que buscamos con esto ye buscar la estética de les nuestres llocalidaes, lo que ye un oxetivu lo suficientemente sólidu pa siguir, pero tamién tresmitir un mensaxe de llocalidaes modernes que miren pal futuru y van na llinia del cuidáu al medioambiente», esplicó l'alcalde.