Chamorro esixe más xueces tres el parón de la pandemia

El presidente del Tribunal Cimeru de Xusticia d'Asturies pidió que'l refuerzu de los xulgaos que ta baraxando'l Principáu contemple tamién la figura de los xueces

 El presidente del Tribunal Superior de Justicia de Asturias (TSJA), Jesús María Chamorro
El presidente del Tribunal Superior de Justicia de Asturias (TSJA), Jesús María Chamorro

redacción

El presidente del Tribunal Cimeru de Xusticia d'Asturies, Jesús María Chamorro, pidió que'l refuerzu de los xulgaos que ta baraxando'l Principáu, que supondría la suma de 12 funcionarios y 3 secretarios nos xulgaos de lo mercantil d'Uviéu y Xixón, contemple tamién la figura de los xueces, yá que «nun tendría sentíu ensin naide que pueda resolver lo que se tramite».

Tres la xunta que caltuvo cola conseyera de Presidencia, Rita Camblor, y la viceconseyera de Xusticia, Encarnación Vicente, Chamorro valoró esta iniciativa qu'atayaría «cualquier xuba na litixosidá». Al respective de la situación de la xusticia asturiana tres la pandemia, celebró que nun se produció un colapsu, gracies a la “eficaz actuación” del Principáu y de los órganos xudiciales, que yá retomaron la so axenda «al cien por cien». 

Al ser preguntáu pola actividá mientres el mes d'agostu, que va ser arteru a partir del día 11, Chamorro apuntó que «nun va haber especial incidencia» y que se van producir señalamientos «de forma rebaxada». Chamorro tamién se pronunció sobre'l teletrabayu na alministración xudicial a partir de setiembre, sobre la propuesta de concentrar toles infraestructures nuna ciudá de la xusticia. Acerca del teletrabayu, reconoció que «sedría interesante afaelo», una y bones la seguridá xurídica qu'otorga la unidá d'actu y llugar ye «fundamental», anque eso nun evitaría que delles actuaciones puedan realizase de forma telemática.

Nel casu de la concentración de los órganos xudiciales, resaltó la importancia de que se tenga en cuenta la orografía, l'avieyamientu de la población y l'abandonu de les zones rurales, qu'obligaría a facer llargos desplazamientos pa estos trámites, polo que considera importante «alternar» esta opción cola descentralización de l'alministración.

Nel alcuentru de güei tamién se punxo sobre la mesa la necesidá de dixitalizar el sistema xudicial asturianu, que precisa de ferramientes modernes” y «preseos eficaces» pa llevar a cabu la so función. Coles mesmes, Chamorro sorrayó'l déficit en materia d'infraestructures de los organismos xudiciales asturianos, acentuáu nos parques xudiciales d'Uviéu o Llangréu, ente otros. 

Camblor, pela so parte, plantegó la posibilidá d'establecer refuerzos nos xulgaos de la comunidá nos que fuera necesario pa evitar colapsos por cuenta de la crisis sanitaria del nuevu coronavirus. Según esplicó Camblor, anguaño «prácticamente'l cien por cien» de la plantiya incorporóse a les sedes xudiciales dempués de la declaración del estáu d'alarma pola COVID-19.

 

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Comentarios

Chamorro esixe más xueces tres el parón de la pandemia

Cola ayuda de