IX critica que la campaña de matriculación en Llingua Asturiana llegara a finales de xunu

La formación pide a la conseyera, Carmen Suárez, qu'esplique la incidencia que tuvo'l retrasu nes nueves matrícules

Víctor Suárez Piñero
Víctor Suárez Piñero

redacción

IX pidió a la Conseyería d'Educación qu'esplique los motivos polos que la campaña de matriculación en Llingua Asturiana y Lliteratura llegó a bona parte de los centros el 31 de xunu y la incidencia qu'esta tardanza tuvo na matriculación, yá que la mayor parte del alumnáu fai la eleición nel periodu de pre-matrícula.

Coles mesmes, la vocera de la formación, Ángela Vallina, cuestionó'l criteriu organizativu que ta siguiendo'l Gobiernu autonómicu p'axuntar nel próximu cursu al alumnáu que cursa esta asignatura col que cursa la de Cultura asturiana.

El responsable de Política Llingüística de la formación, Víctor Suárez, treslladó la so esmolición pol futuru de la materia nel escenariu posterior a la pandemia, yá que nun ta claro «cómo se va a xestionar organizativamente» la docencia nesti área, nin les garantíes del profesoráu especialista o los derechos del alumnáu que quier cursar esta asignatura. Suárez tamién amosó la so disconformidá cola campaña de matriculación, pidiendo a la conseyera, Carmen Suárez, qu'esplique la incidencia que tuvo'l retrasu nes matrícules nueves.

A lo último, IX presentó una batería d'entrugues sobre la rellación de puestos d'interinidá pal próximu cursu, nes que pide conocer los motivos pa nun cubrir les necesidaes de los centros na primer convocatoria, cómo pretende avanzase n'educación inclusiva con 82 places menos en Pedagoxía Terapéutica y 69 ensin cubrir n'Audición y Llinguaxe, o sobre les especialidaes a les que se van asignar les 400 nueves places.

Comentarios

IX critica que la campaña de matriculación en Llingua Asturiana llegara a finales de xunu

Cola ayuda de