redacción

El Serida escoyó a tres sementales p'ameyorar la cabaña ganadera del Caballu del Monte Asturianu, una variedá autóctona cerca de la reconocencia oficial como raza. Esti equín ye una variedá autóctona qu'ufierta un altu rendimientu en carne pola so configuración robusta, especialmente nos cuartos delanteru y traseru, y que la so cría requier pocos cuidaos yá que normalmente se cria en llibertá.

Los tres sementales, de nome Barón, Rayo y Apolo, fueron escoyíos un total de 9 exemplares que fueron treslladaos a les instalaciones del Serida en febreru pasáu y cubrieron a 67 de les 90 yegües que fueron escoyíes pa una primer fase. Estos caballos fueron el resultáu de múltiples cruces de yegües del país con caballos foranos, nun procesu de decenes d'años similar al que se desenvolvió nel norte d'España y que dio races como Hispano-Bretón, Burguete, Caballu del Monte del País Vascu y Caballu Pirenaicu Catalán.

El proyectu, desenvueltu en collaboración cola Asociación de Criadores de Ganáu Equino del Monte Asturianu (ACGEM) y l'Asociación d'Investigación d'Industries Cárniquea (ASINCAR) tien el propósitu d'ameyorar el sistema reproductivu del ganáu caballar destináu a alimentación.

La reconocencia oficial de raza del equín del monte asturianu va contribuyir al desenvolvimientu económicu de la rexón, declaró'l conseyeru de Mediu Rural y Cohesión Territorial del Principáu, Alejandro Calvo, nel actu de presentación de los sementales realizáu esti miércoles nel Serida. Anque la so única utilidá ye la producción de carne, estos animales, capaces de sobrevivir a los iviernos nos puertos de monte, ayuden al caltenimientu del sistema de pastos y monte característicu d'Asturies.

El presidente de l'Asociación de Criadores, Adrián Lagar, recordó la importancia d'esta cabaña pa la rexón que concentra'l 42 por cientu de les esplotaciones de carne equino d'España. Anque'l consumu de carne de caballu n'Asturies ye cuasi inesistente, n'otres rexones como Cataluña y el sur d'España ye «significativu», dixo Lagar. Tamién esiste un mercáu «bien importante» en Francia y Alemaña, países a los que podríen esportase productos ellaboraos ya inclusive exemplares vivos, indicó.

La busca d'optimizar un estándar racial afechu a les característiques xeográfiques d'Asturies empecipió en 2014 con un proyectu d'investigación que sentó les bases d'un programa de caltenimientu y meyora.

 

Comentarios

Asturies estudia les posibilidaes cárniques del Caballu del Monte

Cola ayuda de