Dos corredores busquen completar l'aniellu de Picos en menos de 60 hores
31 jul 2020 . Actualizado a las 05:00 h.Los ultracorredores Tito Parra y Julián Morcillo van entamar güei una travesía de 131 kilómetros, con un desnivel de 13.500 metros combinando la carrera y la escalada, pa completar l'Aniellu de Picos d'Europa, nun retu inéditu al incluyir l'ascensión a los visos más significativos d'esti espaciu natural.
Los deportistes tienen como oxetivu completar el percorríu nun tiempu d'ente 48 y 60 hores, coles paraes indispensables pa garantizar la seguridá en caúna de les xubíes.
Con ello pretenden encadenar los principales picos d'esti enclave, como son Torrecerréu, Peña Santa, Friero, Llambrión, Peña Vieya, Morra de Lechugales y l'Urriellu.
Según los corredores, trátase d'una actividá pionera, bien sensible a les condiciones meteorolóxiques.
Julián Morcillo, de 44 años, ye un corredor d'ultradistancia, amás de Doctor en Bioloxía, Meteorólogu y guía acompañante de monte.
Participó en dalguna de les carreres de llarga distancia más dures d'Europa, como'l Tor deas Geants, Spine Race, o Euforia dels Cims, que venció en dos ocasiones.
Amás ye, xunto con Tito Parra y Pablo Criado, unu de los primeros españoles en terminar en menos de 24 hores la mítica Bob Graham Round.
Tito Parra, de 42 años, ye escalador y esquiador y llogró dellos podios n'ultres como Desafío Cantabria y Valls de Aneu y foi cuartu nel Campeonatu d'España FEDME d'Ultres en Trevesera Integral de Picos d'Europa.