Ecoloxistes denuncien dellos vertedorios na redolada del banzáu de San Andrés de los Tacones
ACTUALIDÁ
La Coordinadora critica que'l Conceyu de Xixón nun procedió al control de los referíos llugares de vertedorios
05 ago 2020 . Actualizado a las 05:00 h.La Coordinadora Ecoloxista volvió denunciar que siguen esistiendo dellos vertedorios nel espaciu natural del banzáu de San Andrés de los Tacones en Xixón, ensin que nin el Conceyu nin el Gobiernu d'Asturies tomen midíes a pesar de ser un espaciu natural de calter internacional que se debería salvaguardar y protexer del vandalismu de quien tira esta basoria.
El colectivu asegura qu'estes zones de vertíos de residuos dientro d'una zona d'altu valor natural del ríu Aboño, n'una Zona d'Especial Protección pa les Aves (zona ZEPA), tien d'escorrese, polo que ye precisu una mayor vixilancia nun espaciu natural protexíu, que llevamos reclamando meses que se zarren y llimpien les numberoses zones de vertíos que tenemos atopaos.
«La xestión de los residuos ye una competencia municipal, polo que resulta evidente que'l Conceyu de Xixon nun procedió al control de los referíos llugares de vertíos, nin realizando la obligada retirada de los residuos y derivación de los mesmos a un xestor autorizáu, nin decretó'l zarru cola correspondiente señalización tres la llimpieza de los llugares, lo que podría dar llugar a responsabilidaes penales por omisión del deber d'evitar el delitu de quema forestal», denuncien los ecoloxistes.
Amiesten amás que de los numberosos vertedorios clandestinos qu'hai n'Asturies, munchos d'ellos presenten un evidente riesgu de quema y suponen amás una fonte de contaminación del sosuelu y de les agües.