Cangas abre una oficina pa que ganaderos y llabradores notifiquen los daños causaos polos aguarones monteses
ACTUALIDÁ
El conceyu va pidir al Principáu que se declare de forma oficial la plaga pa que los afectaos puedan recibir ayudes
06 ago 2020 . Actualizado a las 05:00 h.El Conceyu de Cangas abrió esti miércoles la oficina pa que ganaderos y llabradores señalen les finques afectaes pol aguarón montés. L'oxetivu ye llendar la superficie afectada por esta plaga, señalando la afectación nun mapa, pa que'l Principáu pueda tomar midíes al respeutu.
Pa ello, los propietarios de los terrenos van poder señalar les sos finques nel mapa al traviés del teléfonu 985 813 812, indicando los datos de la parcela y el polígonu de les finques. En casu de nun cuntar con estos datos, va poder facese de manera presencial al conceyu, siempres con cita previa, pa evitar aglomeraciones na oficina, pa cumplir cola normativa sanitaria que ta n'usu énte la pandemia de la Covid-19.
El consistoriu considera qu'esti documentu va ser «una bona ferramienta» de trabayu pa facer frente a la plaga, yá que se va llendar la superficie afectada. Por ello dende'l conceyu encamienten a llabradores y ganaderos a que vayan a esta oficina a señalizar los terrenes afectaos pa poder tomar les midíes qu'acaben con estos aguarones monteses.
La oficina va tar abierta los próximos quince díes, coles mires de tener un documentu completu pa la xunta que'l conceyu cangués va caltener col Principáu'l próximu 20 d'agostu.
Nesa xunta va pidise que se declare de manera oficial esta plaga, pa que los afectaos puedan percibir les ayudes pola perda de más del 50% de la so producción de yerba, y puedan financiase tamién los métodos más eficaces que faigan frente a estos aguarones monteses que tán estrozando les finques de dellos puntos del conceyu.