El Principáu ye, con Ourense, la provincia con menos población d'ente 16 y 35 años
13 ago 2020 . Actualizado a las 21:18 h.941 mozos asturianos abandonaron el Principáu en 2019 a otres comunidaes autónomes. Ye unu de los peores saldos migratorios interautonómicos d'España, sobremanera si s'atiende a la población total d'Asturies. Foi la quinta rexón que más población d'ente 16 a 35 años perdió d'entraes y salíes pa otres autonomíes, tres Andalucía, dambes Castielles y Estremadura, y cuasi empatada con Galicia.
Una realidá, la del avieyamientu d'Asturies, que resulta una paradoxa nel Día Internacional de la Mocedá. «Asturies lleva años a lo cabero de la población nueva. Ta empatada con Ourense na última posición tocantes a porcentaxe de persones ente 16 y 35 años con respectu al total. Namás el 16,81% de la población ta nesa franxa d'edá. El Principáu amazcara una realidá llaboral perdura pa los mozos tres unes estadístiques salariales tovía altes poles xeneraciones próximes a retirase de la industria», analiza Yago Sáenz, responsable del Departamentu Confederal de Mocedá d'USO, con datos estrayíos del informe sobro la Situación sociollaboral de la mocedá n'España 2019-2020».
Sáenz recuerda que n'Asturies se da la paradoxa que los titulaos superiores suponen el mayor porcentaxe de paraos por grupos de formación. Nun puede estrañanos que busquen el so futuru lloñe de casa».
L'informe de Mocedá-USO analiza la situación sociollaboral actual de los mozos y esboza dalgunos de los primeros impactos del coronavirus nellos. Sicasí, demográficamente, «pue ser una oportunidá p'Asturies. Munchos de los mozos que taben fuera, principalmente en Madrid, tornaron mientres estos meses porque suspendieron los sos estudios o dexaron los sos emplegos, o porque teletrabayaron. Dalgunos van tomar como un parón, pero otros pue que decidan o puedan volver de forma definitiva. Amás, la imaxe de mayor tranquilidá frente a la pandemia que se vio dende fuera puede inclusive atrayer a otros mozos que puedan teletrabayar y decidan instalase fuera de les grandes ciudaes», augura Yago Sáenz.