El Gobiernu convoca ayudes por 7 millones pa conceyos afectaos pol cierre de centrales térmiques de carbón

El Ministeriu pa la Transición Ecolóxica y el Retu Demográficu publicó nel Boletín Oficial del Estáu (BOE) una convocatoria d'ayudes, dotada con 7 millones d'euros, destinada a sofitar les iniciatives de conceyos, mancomunidaes y otres figures, como agrupaciones ente conceyos y empreses privaes, pa la creación d'empléu sostenible, impulsando l'actividá económica nos conceyos afectaos pol cierre de centrales termoeléctriques de carbón.

La convocatoria va ser xestionada pola Fundación Ciudá de la Enerxía (CIUDEN), entidá adscrita al Institutu pa la Transición Xusta que tien la so sede en Cubillos del Sil (Llión), según información ministerial. A estes ayudes, que se van rexir pol procedimientu de concurrencia competitiva, podrán presentase proyectos nos qu'el so importe financiable tea ente los 25.000 y un millón d'euros y va ser compatible cola percepción d'otres subvenciones o ingresos.

La intensidá de l'aportación aumentó y va tar ente'l 50% y el 75% del costu elexible del proyectu, en llugar del 35% previstu -. El plazu de presentación de solicitúes va ser d'un mes a partir d'esta xornada del 25 d'agostu.

Proyectos financiables

Según el Ministeriu, la evaluación de los proyectos va realizase teniendo en cuenta parámetros de transición xusta, como la localización de la inversión y la so relación cola perda d'empléu directu nel conceyu onde se va a desenvolver; la capacidá pa xenerar puestos de trabayu sostenibles o, el so efectu dinamizador sobro otres actividaes.

Tamién se va tener en consideración la so orientación esportadora, l'impactu nel texíu empresarial del territoriu, los antecedentes de l'actividá na zona o'l valor añadíu del proyectu como, por casu, la so capacidá pa impulsar nueves tecnoloxíes o l'aprovechamientu de recursos endóxenos, informa Europa Press.

---

---