Iberdrola asegura inversiones y va recolocar a 29 emplegaos d'auxiliares

J.S. REDACCIÓN

ACTUALIDÁ

Central térmica que Iberdrola tiene en Lada (Langreo)
Central térmica que Iberdrola tiene en Lada (Langreo) JLCereijido

La empresa aseguró'l cumplimientu de los compromisos adquiríos nos alcuerdos pa una transición xusta de les centrales térmiques

30 ago 2020 . Actualizado a las 05:00 h.

La compañía eléctrica Iberdrola garantizó a los sindicatos el cumplimientu de les inversiones comprometíes tres el zarru de la central térmica de Lada y la recolocación de, polo menos, 29 trabayadores d'empreses subcontrataes.

Según informaron los sindicatos, la empresa aseguró'l cumplimientu de los compromisos adquiríos nos alcuerdos pa una transición xusta de les centrales térmiques nun alcuentru en que comprometió la implantación n'Asturies de 130 megavatios d'anovables cola construcción de cuatro parques eólicos.

Amás, Iberdrola repitió que ta cumpliendo'l so compromisu d'axudicar contratos a provisores asturianos pa les inversiones anovables por valor de 200 millones d'euros hasta'l momentu, según la garantía d'emplegu pa la plantiya de Lada, que va trabayar nos llabores d'esmantelamientu de la central, que van empezar nos próximos meses.

A eses xeres, que se van enllargar más de cuatro años, garantizóse la incorporación de 25 de los 43 trabayadores de subcontrates afectaos pol zarru de la central ente que, de los 18 restantes, a cuatro ufiertóse-yos un emplegu neses empreses pa los otros 14 Ibedrola comprométese a siguir trabayando pa que reciban una ufierta.

La compañía eléctrica garantizó amás el so sofitu na busca proactiva d'otros inversores y participación na ellaboración de los convenios de transición y la puesta en marcha en septiembre d'una Plataforma d'Anovación Ciudadana pa encalzar iniciatives d"emprendimientu, en clave d'anovación pa la transición enerxética.

Coles mesmes, comprometió la so collaboración al traviés d'acciones específiques nel plan de sofitu pa la formación profesional ya insertamientu llaboral que se van concretar en setiembre.

UXT y CCOO incidieron en que van siguir trabayando coles empreses y el Gobiernu central pal cumplimientu de los alcuerdos roblaos col enfotu de que caún de los trabayadores afectaos nos procesos de zarru de les centrales térmiques reciban una propuesta de trabayu y que los territorios afectaos caltengan la industria y población esistentes.

Los sindicatos fixeron públicu'l resultáu de la xunta'l mesmu día en que se conoció que la Dirección Xeneral d'Emplegu del Principáu refugó a Dominion l'espediente de regulación d'emplegu (ERE) por fuercia mayor que solicitara esta empresa auxiliar de la térmica de Lada pa los sos 25 trabayadores.

El Principáu tomó esti determín al considerar que nun se dan les circunstancies necesaries p'aprobalu yá que l'esmantelamientu de la central eléctrica d'Iberdrola anuncióse va trés años pero, según fontes sindicales, la empresa vieno de forma inmediata a presentar otru ERE pa tola so plantiya amparáu en causes productives.