Una propuesta de Vox al restu de grupos propón que les intervenciones n'asturianu tengan qu'acompañase de traducción

El pidimientu, que se fixo esta mañana al marxe del orde del día de Xunta de Portavoces, va tratase'l llunes

Pleno semipresencial de la Junta General del Principado de Asturias.
Pleno semipresencial de la Junta General del Principado de Asturias.

redacción

Los grupos parllamentarios na Xunta Xeneral van analizar esta selmana una propuesta de Vox p'articular l'usu del asturianu na Cámara autonómica. El pidimientu, que se fixo esta mañana al marxe del orde del día de Xunta de Portavoces, va tratase'l llunes. Va ser la Mesa de la Cámara la que decida, depués d'escuchar la Xunta de Portavoces. Según indicó en declaraciones a los medios el portavoz de Vox, Ignacio Blanco, busquen facer les coses «con normalidá» nel parllamentu y evitar «montar espectáculos» cada vez qu'haya una intervención n'asturianu. El diputáu de Vox incidió en que l'asturianu nun ye llingua cooficial de la comunidá y, polo tanto, repite que tien de garantizase la so comprensión. Pa eso, propón que cuando vaigan facer una intervención n'asturianu, pasen enantes el testu en castellanu al restu «pa evitar interrumpir el plenu».

Una posibilidá que, asegura, pareció «razonable» a la «mayoría» de formaciones, pa evitar la traducción simultanea. Blanco dixo que Podemos ye'l grupu más «belixerante» con esti asuntu y señaló que dende la formación morada plantearon la posibilidá de doblar los tiempos d'intervención de los diputaos pa qu'intervengan n'asturianu y castellanu, o traducir tamién les intervenciones de castellanu a asturianu. Dende Vox alvierten de que «si nun hai alcuerdu» nun refuguen recurrir l'artículu 3 bis del Reglamentu de la Xunta Xeneral énte'l Tribunal Constitucional, nel que s'indica que «nel marcu de lo establecíu nel Estatutu d'Autonomía y, nel so casu, na llexislación que lo desenvuelva, tanto los Diputaos nel exerciciu de les sos funciones parllamentaries como los miembros del Conseyu de Gobiernu, los cargos y empleaos públicos y cualquier persona que compareza énte la Cámara van poder utilizar l'asturianu».

Dellos grupos señalaron esti miércoles la so disposición a articular l'usu de la llingua nel parllamentu, como PP, Ciudadanos y Foru, mentes que PSOE, Podemos y IX nun realizaron declaraciones sobre esi tema. El PP apela al consensu pa facilitar la comunicación y comprensión de tolos asuntos parllamentarios. El so diputáu Pablo González añadió, coles mesmes, qu'esi entendimientu tien que garantizase «ensin costos» pa la Cámara, que nun tien serviciu de traducción. «Lo que nun ye problema na cai nun pue ser problema na Cámara», diz González, aspirando a «facer compatible» el derechu a usar l'asturianu col derechu a entender lo que se diz na Xunta Xeneral.

La portavoz de Ciudadanos, Susana Fernández, tamién diz ser partidaria del «consensu» ente los grupos y pide que nun implique «gastu» pa la Cámara. Con too, mostróse a favor d'articular l'usu del asturianu «porque non tol mundu tien qu'entender 100% el bable, al nun ser llingua cooficial». D'esta manera, fala d'algamar un alcuerdu «y evitar un circu», paralizando sesiones cada vez qu'haya intervenciones n'asturianu y daquién diga que nun les entiende, según informa Europa Press.

Comentarios

Una propuesta de Vox al restu de grupos propón que les intervenciones n'asturianu tengan qu'acompañase de traducción

Cola ayuda de