Cuatro rutes pelos parques naturales de Somiedu y Les Ubiñes-La Mesa pa impulsar el turismu de naturaleza

J.S. REDACCIÓN

ACTUALIDÁ

Embalse de Valdemurio (Quirós).Embalse de Valdemurio (Quirós)
Embalse de Valdemurio (Quirós) TURISMO ASTURIAS-JANO FOGGIA

La Fundación Oso d'Asturies entama una actividá nueva na que tamién van retirar los residuos qu'atopen

07 oct 2020 . Actualizado a las 05:00 h.

La Fundación Oso d'Asturies pon en marcha esti domingu 11 una actividá nueva empobinada a tou tipu de públicu -n'especial, a mayores de 8 años-. Trátase de paseos didácticos d'interpretación del mediu natural y del hábitat oseru entamaos por un especialista de la fundación. Amás, van aprovechar estes salíes pa la retirada de residuos qu'atopen na naturaleza.

Estes xornaes van desenvolvese hasta'l 15 de payares nos parques naturales de Somiedu y Les Ubiñes-La Mesa nel marcu del programa «El turismu de naturaleza y la basuraleza nos Montes del Osu», financiáu por Liberar. En concretu, les feches previstes -que podríen variar en función de les condiciones climátiques- son les siguientes:

-11 d'ochobre: Tramu de la Sienda del Osu que va dende Arroxo hasta'l Banzáu de Valdemurio (Quirós)

-25 d'ochobre: Ruta de los Llagos de Saliencia (Somiedu)

-31 d'ochobre: Ruta Área recreativa de Cueva Güerta ? Parque de la Prehistoria (Teberga)

-15 de payares: Ruta del Fayedal de Montegrande (Teberga).

Cada salida, que va tener siempres calter gratuitu, va dar empiezu a les 10.30 hores y va estendese hasta les 14 hores. Amás, pa toos aquellos inscritos, va impartise pela tarde un taller de sostenibilidá ambiental na Casa del Osu.

Pa participar va ser necesaria inscripción previa nel 985 963 060 o en info@osodeasturias.es, yá que va haber un aforu máximu de 15 persones y mínimu de cinco. Coles mesmes, va ser imprescindible l'usu de mázcaru y va encamentase l'usu de xel hidroalcohólico y caltener la distancia de seguranza siempres que seya posible.