El reciclaxe intelixente gana terrén n'Asturies

J.S. REDACCIÓN

ACTUALIDÁ

Basura en el vertedero de Cogersa
Basura en el vertedero de Cogersa

El proyectu SmartWaste axunta datos a lo llargo del procesu de recoyida y selección de residuos

30 oct 2020 . Actualizado a las 05:00 h.

La tecnoloxía lleva años faciéndose güecu na nuestra sociedá y cada vez cobra más protagonismu en tolos ámbitos de la nuestra vida. Ye por ello que, de la mesma forma que nos ayudó a ameyorar la forma na que comunicamos, utilizamos el tresporte o mercamos un productu, TheCircularLab -el centru d'anovación abierta d'Ecoembes en materia d'economía circular-, en collaboración con Minsait, la unidá de negociu d'Indra que da rempuesta a los retos de tresformamientu dixital n'empreses ya instituciones, desenvolvió SmartWaste, un proyectu qu'aplica la tecnoloxía más puntera nel procesu de reciclaxe.

El Principáu d'Asturies, gracies a la collaboración ente TheCircularLab y COGERSA, ye una de les primeres autonomíes n'aplicalo p'ameyorar y optimizar el so sistema de recoyida y selección de residuos de los contenedores mariellu (envases de plásticu, llates y briks) y azul (papel y cartón).

SmartWaste ye una plataforma que, integrándose con otres yá esistentes al traviés del Internet de les Coses y el big data, ye capaz de recoyer tolos datos a lo llargo del procesu de reciclaxe, dende la recoyida, pasando pol tresporte nos camiones, hasta la descarga en planta. Esta recoyida de datos en tiempu real, según el so posterior analís y estudiu, dexa tanto a Ecoembes como a les alministraciones públiques asturianes disponer de tola información pa implementar y optimizar los procesos arreyaos, amás d'ayudar a una toma de decisiones estratéxica y eficiente.

Dichos datos llógrense gracies a la integración con otres plataformes comerciales que xestionen los sensores y los sistemes de GPS instalaos nos camiones de recoyida y a la tecnoloxía integrada na planta de selección onde se reciben y clasifiquen los residuos. Estos apurren muncha d'información sobro la cantidá de residuos que descarga cada vehículu na planta, l'inventariu total de contenedores (azul o mariellu), según la ruta que se realizó pa recoyelos. Estos datos dexen tomar midíes qu'adecuen la frecuencia de recoyida, les rutes que tien de realizar cada camión o los llugares nos que faen falta más o menos contenedores.

Amás, gracies a SmartWaste ye posible envalorar les densidaes de cada residuu. Esto reflexa si los ciudadanos tán depositando los envases nel contenedor que correspuende, lo que de la mesma dexa a les instituciones desenvolver campañes concretes de concienciación afeches a la forma de reciclar de los ciudadanos asturianos. Poro, trátase d'una plataforma que non solamente ameyora los procesos de recoyida y selección, sinón que tamién contribúi a ameyorar la calidá de vida de los ciudadanos y fomentar la so participación nel reciclaxe.

A lo último, SmartWaste dexa conocer si l'allugamientu y dotación de los contenedores ta afecha a les necesidaes d'aportación ciudadana pa cada área concreta, de manera que la entidá que xestiona los residuos sólidos n'Asturies (COGERSA) pueda decidir si se deben buscase nuevos allugamientos, camudar les esistentes o ampliales.