«Taller pa paisanos», un cursu sobre la influyencia del xéneru nes organizaciones sociales

El Conseyu de La Mocedá d'Uviéu entama un cursu denomáu «Taller pa paisanos» que va ser impartíu polos colectivos feministes Milenta Muyeres y AMA Asturies. El taller empieza esti martes a les 5 la tarde y va tener una duración de 4 sesiones, tolos martes de payares y el primeru d'avientu.

Les 4 sesiones del cursu van dar respuesta a les 4 entrugues que planteguen los organizadores: «¿Afecta'l xéneru nes organizaciones?», «¿Qué ye participar?», «Llibertá y masculinidá y viceversa» y «Cómo facer feminismu pa toos». Na primera d'elles encetará'l tema de les organizaciones polítiques mistes y les sos tensiones dende una perspectiva de xéneru, ente que na sesión de participación va cavilgar sobro los modelos de participación venceyaos a los roles de xéneru, aprendizaxes sociales, niveles de participación, actitúes y espacios de tomes de decisiones.

La tercer sesión va centrase nes representaciones y les tensiones de la masculinidá y los sos posibles tresformamientos, y va tar travesada pola entruga de fondu sobre si «la masculinidá hexemónica ye compatible cola llibertá». La cuarta y última, va abrir un espaciu pa cavilgar xunto colos homes sobre los retos que tien per delantre'l feminismu pa construyir «un feminismu pa toos».

Los homes pueden xugar un papel clave pa compensar los discursos antifeministes, espliquen les organizadores, que destaquen que «la repuesta a esti taller per parte de los homes foi bien positiva». Milenta Muyeres y AMA Asturies, xunto al Conseyu de la Mocedá d’Uviéu, faen una «mui bona valoración» sobre esti tipu d'iniciatives qu'abren «reflexones imprescindibles sobre les masculinidaes». «Pensar esti tema ye necesario pa, per un llau, combatir de forma más eficaz les violencies machistes y les desigualdaes, y per otru, construyir organizaciones polítiques y sociales más feministes y trabayar por un feminismu qu'incorpore a los homes», aseguren.  

---

---