PSOE apoya nel Congresu impulsar reformes estatutaries pa reconocer l'asturianu como llingua oficial

El Plenu aprobó col votu a favor del PSOE, una iniciativa promovida por Unidas Podemos y los independentistes

El Congreso de los Diputados
El Congreso de los Diputados

El Plenu del Congresu aprobó esti xueves, col votu a favor del PSOE, una iniciativa promovida por Unidas Podemos y los independentistes qu'encamienta al Gobiernu a impulsar y apoyar reformes estatutaries pa reconocer la oficialidá de llingües nueves, como l'asturianu o l'aragonés, amás de permitir l'usu de les distintes llingües cooficiales en territorios del mesmu espaciu llingüísticu.

Estos dos puntos, xunto con otru qu'aboga por que l'Executivu muestre «un respetu real» pola realidá plurillingüe del país y la igualdá llingüística, son los únicos que salieron esti xueves alantre na votación d'esta iniciativa, que constaba con un total d'ocho.

El martes, nel debate de la iniciativa, el PSOE dexó claro que nun apoyaría nel so conxuntu'l testu impulsáu por Unidas Podemos, los independentistes d'ERC, Bildu, Junts, PDeCAT y la CUP, los nacionalistes de PNV y el BNG, xunto Más País y Compromís por buscar «una confrontación estéril» y contener «dellos asuntos inconstitucionales». Coles mesmes, los promotores pidieron una votación por puntos pa salvar dalgunos d'ellos.

Asina, consiguieron que salga alantre, col apoyu del PSOE y el refugu del PP, Vox y Ciudadanos, un puntu que pide al Gobiernu impulsar y apoyar reformes estatutaries pa la oficialidá de les llingües propies qu'entá nun son oficiales «nuna parte o la totalidá del territoriu onde se falen».

Na defensa de la iniciativa, la portavoz de Bildu, Mertxe Aizpurua, insistió en que se refería al asturianu y al aragonés. Tamién podría ser aplicable a la reconocencia del catalán en parte d'Aragón o del gallegu en zones de Llión.

El PSOE tamién apoyó otru apartáu de la proposición que emplaza al Gobiernu a permitir l'usu alministrativu de les distintes llingües entre territorios del mesmu espaciu llingüísticu, dientro y fuera de les fronteres alministratives, ensin barreres y firmando alcuerdos pa la recepción recíproca de medios de comunicación dientro d'esos espacios llingüísticos. Tamién nesti casu'l PP, Vox y Ciudadanos votaron en contra.

Eso sí, tanto'l PSOE, como'l PP y Ciudadanos apoyaron l'últimu de los puntos de la iniciativa d'Unidas Podemos y los independentistes que fai una demanda xenérica al Gobiernu, al que reclama «respetu real, basáu en derechos y deberes y na actuación comprometida de tolos poderes del Estáu» en rellación coles distintes llingües oficiales que conviven nel país. Vox opúnxose a esti puntu.

Pidíen acabar cola «imposición del castellanu»

Esta iniciativa, que se fixo sobre la base de les aportaciones realizaes por asociaciones pola igualdá llingüística como Plataforma per la Llengua, Òmnium Cultural, Kontseilua o A Mesa pola normalización llingüística, ente otros, pidía acabar colo que consideren una «imposición llegal del castellanu» n'España.

Por eso, los partíos firmantes reclamaben, entre otres coses, estender y xeneralizar l'usu de les llingües cooficiales reconocíes, garantizar el so usu nel Congresu y el Senáu, los tribunales de xusticia o RTVE y permitir que figuren nel etiquetáu de productos, enunciaos que'l PSOE sí refugó.

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Comentarios

PSOE apoya nel Congresu impulsar reformes estatutaries pa reconocer l'asturianu como llingua oficial

Cola ayuda de