Impulsores de la PNL que garantiza l'usu de llingües cooficiales van pidir aconceyar con Iceta
ACTUALIDÁ
Iván Llera calificó l'apoyu del Congresu como «un reconocimientu mui importante al llabor que vinimos faciendo nos últimos años»
08 abr 2021 . Actualizado a las 17:24 h.Les entidaes culturales qu'impulsaron la Proposición non de Llei (PNL) que garantiza l'usu de les llingües cooficiales valoraron los puntos de la iniciativa aprobaos nel Congresu de los Diputaos y anunciaron que van pidir aconceyar col ministru de Política Territorial, Miquel Iceta, pa dar pasos en firme.
Na comparecencia simultánea participaron el secretariu xeneral d'Euskalgintzearen Kontseiua, Paul Bilbao; María Arenys de Ciemen; Francesc Marco, de Plataforma per la Llengua (Cataluña); el presidente d'A Mesa pola Normalización Lingüística, Marcos Maceira (Galicia); Alexandra Usó, d'Escola Valenciana; Toni Gisbert, d'Acción Cultural del País Valencia (País Valenciá) y Iván Llera, d'Iniciativa pol Asturianu (Asturies).
Los participantes na comparecencia mostráronse convencíos de que, en materia llingüística, «queden munches ventanes por abrir». «Con esta PNL abrimos una ventana pa garantizar l'usu de les llingües propies, pero queden munches ventanes por abrir, muncho por facer», alvirtieron.
Les distintes entidaes, según informaron, convinieron que caúna «active les sos propies dinámiques», que permitan implementar nos distintos territorios los puntos aprobaos de la PNL y confirmaron que van apellar al Gobiernu español pa que cumpla lo prometío.
«Ye hora de dar pasos firmes, vamos siguir reclamando al Gobiernu, polo que vamos pidir una xunta col ministru de Política Territorial, Miquel Iceta, que tien competencies como la Oficina de Llingües Oficiales», indicaron les asociaciones.
Per otru llau, el presidente d'Iniciativa pol Asturianu, Iván Llera, calificó l'apoyu del Congresu como «un reconocimientu mui importante al llabor que vinimos faciendo nos últimos años dende la nuestra organización».
«L'apoyu del Congresu a esta midida constitucional va permitinos aumentar la presión sobre los partíos qu'apoyen la oficialidá na Xunta Xeneral p'abrir el debate sobre la reforma del Estatutu bien ceo, amás d'intentar atrayer a otres formaciones», indicó.