El PP quier que'l Congresu se pronuncie en contra de la reconocencia del asturianu como llingua oficial
ACTUALIDÁ
La llingua «predominante dafechu» nel Principáu ye'l castellanu, afirmen
21 abr 2021 . Actualizado a las 19:09 h.El PP presentó nel Congresu una iniciativa cola que pretende que la Cámara Baxa muestre la so refuga a la declaración del asturianu como idioma oficial n'Asturies porque, según afirmen, la llingua «predominante dafechu» nel Principáu ye'l castellanu.
Los de Pablo Casado rexistraron esta proposición non de llei na Comisión Constitucional y con ella muestren la so disconformidá col presidente asturianu, Adrián Barbón, y cola portavoz del PSOE nel Congresu, l'asturiana Adriana Lastra, por espresar «la so intención d'empezar el procedimientu pa declarar oficial el bable».
Nel testu, los 'populares' remarquen que la declaración oficial del asturianu «nun ta ente les prioridaes de la gran mayoría de la sociedá asturiana» y denuncien que, amás, «supondría esviar recursos imprescindibles pa otros fines». Tamién alerten de qu'esto podría significar «la creación d'una rede clientelar al so alredor, el peor de los escenarios nel que pue asitiase la cultura o la educación».
Nesti puntu, recuerden que la llingua vehicular na educación asturiana ye'l castellanu y piden potenciar esti ámbitu al traviés d'un billingüismu col inglés en toles etapes o fomentar una segunda llingua estranxera.
P'acabar, señalen que reconocer l'asturianu supondría un cambiu nel Estatutu d'Autonomía d'Asturies, que tien qu'aprobase nes Cortes Xenerales, polo qu'insisten en pidir al Gobiernu de Pedro Sánchez que nun promuevan la oficialidá d'esti idioma.