El stand d'Asturies va siguir calteniendo una filosofía «ecofriendly»
30 abr 2021 . Actualizado a las 19:15 h.Asturies va presentar una imaxe inspirada na naturaleza en Fitur, la Feria internacional de Turismu, que celebra la so edición «Especial Recuperación Turismo», del 19 al 23 de mayu, en Feria de Madrid.
Col lema «Asturias destino de aventura y ecoturismo», la comunidá autónoma va destacar, sobre manera, nel so stand un espaciu tecnolóxicu y visual dixital especialmente enfocáu a xenerar esperiencies sensoriales y dixitales sobre l'aventura y la naturaleza. El protagonismu de la naturaleza nel stand va reflexase al traviés d'un «monte d'esperiencies», un auténticu monte escenográficu y hiperrealista con plantes naturales liofilizaes y artificiales, según indiquen dende'l Principáu d'Asturies. Amás, una «galería inmersiva» va ser l'elementu principal y más relevante del pabellón, tanto pol so tamañu y allugamientu como pola esperiencia sensorial y audiovisual, que va tresportar a los visitantes a una realidá virtual.
El conceptu innovador d'anguaño, amás de la tecnoloxía, va ser una «piel testil» que conforma unos potentes volumes na parte cimera del stand. «Trátase d'unes tires de yute recicláu que van llevar grandes imáxenes impreses, que recuerden a los visitantes como'l paisaxe d'Asturies ye yá de por sí una invitación a l'aventura. Amás, éstes van reforciase con llargues tires de lluces».
El stand d'Asturies va siguir calteniendo una filosofía «ecofriendly», con especial cuidáu medioambiental. «Los elementos de madera tán realizaos con madera recuperada o proveniente de montes controlaos. Y esta esmolición medioambiental va ser estensiva a tolos elementos del stand», informa Europa Press.