La muestra inclúi 25 obres d'oleu sobre llenzu pintaes ente 2006 y 2009 y va poder visitase hasta'l 11 de xunetu na sala d'esposiciones del Edificiu Históricu
09 jun 2021 . Actualizado a las 05:00 h.La sala d'esposiciones del Edificiu Históricu de la Universidá d'Uviéu acueye dende'l 9 de xunu la esposición «Últimos refugios» de Jaime Herrero, una muestra que va poder visitase hasta'l 11 de xunetu. Comisariada por Luis Feás Costilla, «Últimos refugios» surde tres una esposición antolóxica celebrada na Sala Cultural Cajastur Teatru Campoamor d'Uviéu en 2006. Espuesta con Caja Duero, percorrió Salamanca, Valladolid, Madrid y Zaragoza ente 2008 y 2009, añu en que foi exhibida na Galería Gema Llamazares de Xixón, con dellos cuadros nuevos. La muestra completa hasta agora nun se viera n'Uviéu, «onde'l pintor tenía'l so estudiu, nel que quedó un últimu cuadru inacabáu», esplica Feás.
En total, l'Edificiu Históricu va exhibir 25 obres d'oleu sobre llenzu, pintaes ente 2006 y 2009. Como esplica'l catálogu de la esposición Ana María Fernández García, catedrática d'Hestoria del Arte de la Universidá d'Uviéu, «los "Refugios" d'Herrero traten de bisarmes o, meyor dichu, del fuximientu personal y plásticu p'abellugase d'ellos». Feás amiesta que «Jaime Herrero pinta eses bisarmes como revoltixos fechos con espátula o resfregaos, cola espresividá propia de daquién que percorrió les más coraxoses maneres de distorsión figurativa nes corrientes artístiques del sieglu XX».
Agora, va ser la sala d'esposiciones de la Universidá la qu'amuese los Últimos "Refugios" del pintor xixonés, fináu en 2020. La inauguración de la esposición va ser el 9 de xunu, a partir de les 19:00 hores. Nella, van participar l'hermanu del pintor, Carlos Herrero; el rector de la Universidá d'Uviéu, Ignacio Villaverde, y la vicerrectora d'Estensión Universitaria y Proyección Cultural, Carmen Adams.