Política Llingüística prepara una campaña de normalización para los supermercaos y la sidra

La Voz REDACCION

ACTUALIDÁ

sidra asturiana
sidra asturiana

Tamién se tá estudiando l'encaxe del asturianu dientro de la llei nueva d'educación o la so entrada dientro de les escueles oficiales d'idiomes

30 sep 2021 . Actualizado a las 18:33 h.

La Dirección Xeneral de Política Llingüística ta na parte final de la tramitación alministrativa de dos campañes de normalización, una destinada pa los comercios del sector alimentariu y otra sobre la sidra y el so vacabulariu tradicional.

Asina lo anunció'l director xeneral del ramu, Antón García, que compareció na Comisión de Cultura, Política Llingüística y Turismu de la Xunta Xeneral a petición de Ciudadanos pa informar sobre los temes qu'afecten a la so cartera.

Nesi sentíu, García repasó les acciones entamaes pola so Dirección Xeneral y anunció les que diben venir nos meses próximos, colos pegollos de la «tresversalidá y la normalización» y nel asturianu «como derechu y non como obligación». Asina, tán trabayando dientro de l'alministración y fuera, col enfotu de da-y visibilidá pública.

«Iniciatives tresversales pa qu'Asturies tenga un paisaxe llingüísticu d'alcuerdu cola so realidá», esplicó, pa indicar que pal añu 2022 van recuperar les llinies de subvenciones pa proyectos empresariales y p'asociaciones.

Amás, nestos momentos tán trabayando en «reforciar» los servicios de normalización llingüística con un decretu que va permitir crear la Rede de Normalización Llingüística. Per otru llau, tán estudiando l'encaxe del asturianu dientro de la llei nueva d'educación o la so entrada dientro de les escueles oficiales d'idiomes.

Tamién pretenden facer la primer convocatoria de exámenes oficiales de gallego-asturianu nesti cursu, trabayen nun programa del enseñu d'asturianu p'adultos en collaboración colos conceyos y, a plazu curtiu, pretenden poner en marcha na Universidá d'Uiéu una área de conocimientu de llingua asturiana.

P'acabar, trabayen na aprobación d'un decretu nuevu de toponimia pa poder oficializar el nome de los accidentes xeográficos y tán en contactu con Delegación de Gobiernu pa que l'Alministración central use la toponimia oficial, informa Europa Press.