El 96% de casi les 7.000 llingües son falaes namás pol 4% de la población mundial mentanto alredor del 6% de los idiomes tienen más de 1 millón de falantes y, en conxuntu, representen más o menos el 94% de la población mundial. Tando asina les coses, nun tenía que sorprendenos que cada dos selmanes desapaeza una llingua. Ye más, la Organización de les Naciones Xuníes pa la Educación, la Ciencia y la Cultura (UNESCO) calcula que ye mui posible qu’a lo cabero d’esti sieglu más de la metá de les llingües del mundu tean desaniciaes. Dende llueu, sedría mui llamentable qu’una d’eses llingues fuere l’asturianu y, más llacerioso entá, alvirtiendo como s’alvierte d’ello nel Atles UNESCO de les llingües del mundu en peligru de desaniciu.
La mayoría de los y les asturianes nun queremos que despaezan les nuestres llingües, l’asturianu y l’eonaviegu, porque tresmiten una gran sabiduría, alimenten una forma de vida, constituyen un universu, un patrimoniu inmaterial, una seña d’identidá y, a lo cabero, ayúdennos a «describir y catalogar el nuestru mundu». Esa riqueza y diversidá cultural y llingüística ye tamién de dalguna manera una forma de vida que forma parte del nuestru patrimoniu natural y de la nuestra idiosincrasia. Protexer una llingua ye una inversión: esto ye, a lo cabero, xenera riqueza. Les llingües reconocíes oficialmente n’España contribuyeron a aumentar el PIB nes sos respectives comunidaes y cuntaron con una dotación económica tanto del Estáu Español como de la Xunión Europea, cola que l’asturianu nun cuntó al nun ser oficial. Aina l’Institutu Valencianu d’Investigaciones diznos que l’impactu económicu que supunxo la oficialidá del valencianu foi de 2.000 millones d’euros, xeneró’l 3 % del empléu (56.000 puestos de trabayu) y el 2,1 % del PIB. El vascu nun quedó p’atrás: nun estudiu de 2015 algamó la cantidá de 2.800 millones d’euros, 56.142 puestos de trabayu (6,28 % del total) y 4,2 % del PIB; y, nel casu de Galicia, el Consello da Cultura Galega diznos que l’impactu ye de 1.103 millones, 30.000 empleos y un 2 % del PIB.
Ello ye que los miopes cortoplacistes de pensamientu reduccionista, que se consideren conservadores, anque en cuenta conservar pretenden acabar con una llingua milenaria cola so indiferencia, o lo que ye peor, cola so rensía, despreciu o maltratu, falen dende una posición d’utilitarismu mui mal entendida: «¿Y pa qué sirve l’asturianu?» porque-yos paez que nun ye válidu pa los conteníos serios como la divulgación y les comunicaciones científiques, universitaries y profesionales, como si clasificar asina una llingua nun fuere dalgo arbitrario rexío por dellos factores que nun son intrínsecos a les llingües y ensin comprender, por exemplu, que l’inglés va tiempu que desbancó al español nel mundu de la ciencia y el de los negocios.
¿Qué podemos facer pa conservar l’asturianu, pa nun perder esta riqueza de tantu valir? Lo primero ye tener una gran altura de mires que nos faga posible cuidalu como cuidamos a tolo que ta en peligru de desapaición. Tratalu con cariñu, normalizalu y da-y prestixu en toles fasteres necesaries y de toles maneres. ¡Por supuesto qu’hai qu’encariñase de verdá cola nuestra llingua y tresmitila lo meyor que podamos a les nueves xeneraciones! En resumíes cuentes tenemos que comprometemos a salvaguardala de los peligros que la acechen. Esi llabor nun ye namás de los gobiernos, deberíemos ente toos y toes comprometenos nesta xera. N’Asturies, n’España y nel mundu «nun sobra nenguna llingua nin nenguna cultura». Nel sieglu XVIII Xovellanos dicía que l’asturianu yera «la llingua viva del nuestru pueblu; toos lu mamamos, por dicilo asina, cola primer lleche; va pasando tradicionalmente de padres a fíos y síguese de xeneración en xeneración». D’entós p’acá l’asturianu pasó per munchos reveses y represiones que torgaron que medrare de la manera acondada.
Na actualidá, el monollingüismu ye dalgo poco frecuente nes sociedaes actuales, cada vegada más interrellacionaes. Na Xunión Europea fálense alredor de 60 llingües «rexonales o minoritaries». Respeuto a la situación española, un 40% de la ciudadanía vive en comunidaes con más d’una llingua oficial, ensin cuntar les comunidaes que, como la nuestra, nun gocien de la protección xurídica que da la oficialidá. Naguamos por vivir nuna Asturies cada día meyor, más plural, más rica, más culta ya inclusiva, que cumpla colos mandatos de la Constitución española y pa eso ye necesario protexer un patrimoniu inmaterial de valor incalculable y que forma parte del nuesu mancomún dende va más de diez sieglos. El billingüismu fai posible riqueza y valor añedíu y posibilita crear industries propies, bien dinámiques, nel ámbitu cultural y d’ociu.
Les palabres han vistise como dioses y degolar como páxaros, diz un proverbio hindú. Asturies tien que llevantar tamién la so voz pa defender les nuestres llingües y eso ye lo que munchos ciudadanos y ciudadanes vamos facer. Güei ta más cerca que nunca que llogremos salvar les nueses llingües milenaries. Naguamos pa que seya la última vegada que tengamos que salir a la cai a pidir la necesaria protección xurídica: la oficialidá.