El sábadu 23 d'abril van entregase los premios lliterarios y artísticos en llingua asturiana del añu 2021
ACTUALIDÁ
L'actu va facese'l les 17.30 hores na sala chill out de Llaboral Centru d'Arte, en Xixón, y va cuntar cola actuación del grupu Baxel
21 abr 2022 . Actualizado a las 20:23 h.La conseyera de Cultura, Política Llingüística y Turismu, Berta Piñán, va presidir el sábadu 23 d'abril la gala d'entrega de los ocho premios lliterarios concedíos nel 2021 pol Gobiernu asturianu. L'actu va facese'l les 17.30 hores na sala chill out de Llaboral Centru d'Arte, en Xixón, y va cuntar cola actuación del grupu Baxel.
La gala d'entrega de los premios lliterarios n'asturianu va reconocer a los autores premiaos nes convocatories de la Dirección Xeneral de Política Llingüística a lo llargo del 2021.
L'añu pasáu impulsáronse dos categoríes nueves pa reconocer la meyor obra de narrativa moza, al traviés del Premiu Enriqueta González Rubín, y la meyor traducción al asturianu col Premiu Florina Alías. Eses dos disciplines súmense a los gallardones de poesía, lliteratura infantil y xuvenil, ensayu, teatru profesional, cómic y novela.
La nómina de premiaos va abrila la obra Boliescritu de primavera, de Xilberto Llano Caelles, gallardonáu col Premiu María Josefa Canellada de Lliteratura Infantil y Xuvenil. Pela primer vez, nel 2021 convocóse'l Premiu 'Florina Alías' a la Meyor Traducción al asturianu. La traducción de 'La Biblia' al asturianu, editada pola Sociedá Bíblica, foi la obra ganadora.
Otra manera, el filólogu Ramón d'Andrés foi distinguíu cola ventésima séptima edición del Premiu Máximo Fuertes Acevedo d'Ensayu por Una ciencia sin enfotu. La obra La cafiante muerte de Nicolai Bostov, del escritor José Ángel Gayol, foi la ganadora de la 42 edición del Premiu Xosefa Xovellanos de Novela.
El Premiu Xuan María Acebal de Poesía n'asturianu recayó anguaño nel poemariu Cantar de ti mesma, de Pablo Texón Castañón, mentes que l'ilustrador y escritor Ángel de la Calle va recoyer el Premiu Alfonso Iglesias de Cómic por Paez que nun foi ayeri.
P'acabar, Teatru Nun Tris con La reina de la guapura de Leenane fíxose cola última edición del Premiu Nel Amaro de Teatru Profesional y el Premiu Enriqueta González Rubín de Narrativa Moza, pa menores de trenta y ún años, premia nesta ocasión la novela 'No que cinca los seres de lleenda', de Blanca Fernández Quintana. informa Europa Press.