L'asociación cultural diz que ye «falso» que la filoloxía y el consensu social lo equiparen con eonaviegu
16 may 2022 . Actualizado a las 20:21 h.L'asociación Xeira denunció esti llunes que'l Gobiernu asturianu introdució de «manera irregular» el nome de eonaviegu pa referise al gallego-asturianu nel decretu de creación de la Rede de Normalización Llingüística, que se publicó güei nel BOPA.
Nel preámbulu, el decretu diz que les llingües tradicionales adaptaron la so denominación al aceptáu pola filoloxía y la sociedá, con asturianu o llingua asturianu sobre bable, mentes que «la denominación gallego-asturianu equiparóse a la d'eonaviegu o llingua eonaviega».
Según denunciaron al traviés de nota de prensa dende Xeira, la versión publicada esti llunes nel BOPA nun se correspuende col borrador presentáu al Conseyu Asesor de Política Llingüística nin col testu que salió a información pública.
L'asociación recuerda que ye «falso» que la filoloxía y el consensu social equiparen na actualidá gallego-asturianu con eonaviegu, polo que califiquen la situación d'una «trampa argumental impropia del rigor de la llexislación d'un Gobiernu seriu» que «busca dar carta de naturaleza na llexislación a una denominación hasta agora inexistente nella», informa Europa Press.