L'oxetivu ye captar inversiones p'Asturies y qu'amás la oficina valga d'espaciu abiertu pal desarrollu y espansión de les rellaciones comerciales d'empreses asturianes
23 jun 2022 . Actualizado a las 13:29 h.El conseyeru d'Industria, Empléu y Promoción Económica del Gobiernu asturianu, Enrique Fernández, dixo esti xueves que l'Executivu rexonal sigue trabayando nuna alternativa pa la oficina económica y comercial d'Asturies en Madrid.
Nuna comisión parllamentaria y a entrugues d'IX, Fernández nun dio plazos pa l'apertura de la oficina. Esplicó qu'a lo primero se planteaba que fora nun edificiu que ye propiedá del Principáu. «Pero nun va poder ser», indicó, señalando qu'esa propiedá yá tien inquilín.
D'ehí que tean buscando otros allugamientos. La idea, señaló Fernández, ye un proyectu de collaboración público-privada que valga pa «poner l'anzuelu» nun llugar onde existe puxu empresarial, como Madrid.
L'oxetivu ye captar inversiones p'Asturies y qu'amás la oficina valga d'espaciu abiertu pal desarrollu y espansión de les rellaciones comerciales d'empreses asturianes. Na so comparecencia nun ufiertó'l dirixente asturianu detalles de la estructura nin l'organigrama de la oficina.
Dende IX, la parllamentaria Ángela Vallina llamentó que'l Gobiernu asturianu faiga «siguidismu» de delles asociaciones empresariales y afirmó que sería importante facer llabor de 'lobbie' p'Asturies en Bruxeles, onde Asturies tien un edificiu en propiedá. «Y nun tenemos nada», llamentó.