El Principáu avera l'asturianu a los más mozos al traviés de la cultura y l'ociu en Seronda Moza

La Voz REDACCIÓN

ACTUALIDÁ

Esta cita nueva va ofrecer el sábadu 26 en Llanera un programa d'actividaes gratuites empobinaes al públicu d'ente 16 y 35 años

20 nov 2022 . Actualizado a las 12:02 h.

El Gobiernu d’Asturias suma un recursu nuevu p’averar la llingua asturiana al públicu más mozo. Seronda Moza naz como una cita n’asturianu onde los más xóvenes pueden atopar una ufierta cultural y d’ociu desarrollada n’asturianu y gratuita. La primer edición de Seronda Moza va celebrase esti sábadu 26 de payares nel IES de Posada, en Llanera. 

El programa d’actividaes, diseñáu dende la Conseyería de Cultura, Política Llingüística y Turismu, va ufiertar a lo llargo de tola xornada un mercáu cultural y d’asociaciones onde van participar empreses y entidaes que desenvuelven la so actividá n’asturianu. Amás, van facese dellos talleres y la ufierta musical va incluyir una jam session coral p’adaptar dos temes tradicionales n’asturianu y un conciertu de Llevólu’l Sumiciu.

Tola programación ye de baldre, pero la participación nos talleres precisa la inscripción previa nel corréu electrónicu serondamoza@gmail.com. Nun ye menester cuntar con conocimientos d’asturianu pa participar en cualquiera de les actividaes que se van llevar a cabu.