Pente los materiales puede vese una esbilla de semeyes coles distintes formaciones y de los momentos más importantes de la so trayectoria, asina como carteles y distintos oxetos rellacionaos cola banda
20 dic 2022 . Actualizado a las 05:00 h.La Sala 3 del Centru de Cultura Antiguu Institutu de Xixón acueye hasta'l 9 de xineru una esposición que conmemora'l XXXV aniversariu de la banda de rock Dixebra. Nel añu 1987 nacía n'Avilés una de les formaciones musicales más veteranes de la escena asturiana, qu'a lo llargo de toos estos años foron quien a llograr un soníu únicu y orixinal nel que la contundencia del rock amiéstase cola música tradicional y otros estilos como'l folk, el reggae o'l funk.
La so propuesta tien como elementu central la llingua asturiana y unos testos que falen de la realidá socio-política d'esta tierra, faciendo nestes tres décades d'existencia de notarios musicales de la mesma. Na esposición muéstrense seis paneles temáticos: Contestu, Zona Conflictiva, Internacionalismu, Rock n'Ast, Reivindicación Llingüística y Lliteratura.
Nellos trátase de cómo yera la situación qu'arrodiaba a aquellos mozos qu'echaron a andar el grupu y cuála foi la so historia. Pente los materiales puede vese una esbilla de semeyes coles distintes formaciones y de los momentos más importantes de la so trayectoria, asina como carteles y distintos oxetos rellacionaos cola banda. Tamién delles curiosidaes y otros elementos que ye la primer vez que s'exhiben como portaes inédites o diseños descartaos. La esposición cuenta con una parte audiovisual na que se proyecta permanentemente un vídeu con dellos conciertos históricos de varies époques grabaos en distintos llugares y festivales.
Otra manera, el programa de mano que complementa esta muestra ta plantegáu como una pieza de coleccionista, trátase d'un cartafiueyu de 16 páxines con abondantes elementos gráficos y testos, ente otros, del escritor y biógrafu de la banda Francisco Álvarez y del so cantante y fundador Xune Elipe.
HORARIOS
De llunes a vienres: 17:30 a 20:30 hores.
Sábados: 12:00 a 14:00 hores y de 17:30 a 20:30 hores.
Domingos y festivos: 12:00 a 14:00 hores.