La segunda edición del Reguerada Fest va incluyir alredor de 30 actividaes de baldre
ACTUALIDÁ
El festival nació l'añu pasáu cola vocación d'averar a la sociedá les actividaes que desenvuelven creadores, entamadores y organizaciones sociales alrodiu de la llingua asturiana
03 oct 2023 . Actualizado a las 16:38 h.La Viceconseyería de Cultura, Política Llingüística y Deporte impulsa la II edición del Reguerada Fest, un puntu d'alcuentru y promoción de la cultura y el mundu empresarial qu'usa la llingua asturiana como seña d'identidá.
D'esta manera, una ventena d'entidaes y creadores van citase en Candás ente'l 13 y el 15 d'esti mes pa mostrar el so trabayu. Amás, va haber cerca de 30 actividaes de baldre. El director xeneral d'Acción Cultural y Normalización Llingüística, Antón García, presentó esti martes la programación d'esta iniciativa. Les actividaes, dirixíes a tolos públicos, incluyen una feria, recitales literarios, talleres, charles, esposiciones y conciertos, que van desenvolvese na Fábrica d'Ortiz, el Teatru Prendes, el Muséu Antón y la Biblioteca de Candás.
El festival nació l'añu pasáu cola vocación d'averar a la sociedá les actividaes que desenvuelven creadores, entamadores y organizaciones sociales alrodiu de la llingua asturiana. El Reguerada Fest fai homenaxe col so nome a Antón de Marirreguera, nacíu nel conceyu de Carreño y autor de la que se considera la primer obra lliteraria n'asturianu que se caltién.
La inauguración de la esposición «Fila/pallabra», una muestra artística de la uvieína Dido Carrero, va dar empiezu al Reguerada Fest el vienres 13 nel Muséu Antón. Per otru llau, la Fábrica d'Ortiz va acoyer a lo llargo del festival un mercáu y una feria de llibros y empreses con venti entidaes participantes.
La llista d'actividaes incluye recitales poéticos, alcuentros con autores y meses redondes, amás de proyecciones de películes asturianes, actuaciones de Teatru Carbayín y cuntacuentos con Carlos Alba. Amás, va haber talleres d'escritura, d'estampación testil y de construcción de títeres pa tolos públicos. Tamién ta prevista una ruta cultural y lliteraria per Candás. La parte musical del Reguerada Fest va tar al cargu de la Banda de Gaites de Candás, Algaire, Alicia Álvarez y el so Kíkiriki pal públicu infantil y Nacho Vegas, que va tocar los sos «Cantares dende'l pie». Va haber, amás, un pasucáis al cargu del Grupu de Baille San Félix.
Toles actividades van ser de baldre. Los detalles de la programación tán disponibles na web www.asturiesculturaenrede.es