Nesta investigación, los comisarios Llorián García y Ricardo Villoria céntrense na so «gracia», entendida como un poder popular allegre y contaxosu, capaz de descolonizar les tradiciones
17 may 2024 . Actualizado a las 14:54 h.Distinguíu col Premiu Nacional de les Músiques Actuales 2023, Rodrigo Cuevas llega a LABboral Centru d'Arte con una esposición que busca xugar cola so figura y el so procesu creativu pa ufiertar al públicu un prisma, un llugar dende'l que mirar y una manera de facer. Al entrar nesta esposición el visitante va poder esplorar l'universu creativu de Rodrigo Cuevas, pero tamién va tener la oportunidá de redescubrise a sí mesmu, nun procesu de tresformamientu similar al que Cuevas realiza cada vez que xube a un escenariu.
La esposición recupera delles entrugues que yá, nos años setenta, plantegó'l teóricu Herbert Marcuse nes sos reflexones sobre'l conceptu de revolución cultural: «¿cómo sería una revolución del erotismu? ¿qué posibilidaes trai la nuesa capacidá pa imaxinar y sentir colectivamente d'otru mou?»
Esta amuesa mira pa delles de les práctiques de Cuevas, saberes informales que l'artista cultiva como parte del so llabor creativu, y que son clave tamién nes sos acciones de vitalismu vecinal. Nesta investigación, los comisarios Llorián García y Ricardo Villoria céntrense na so «gracia», entendida como un poder popular allegre y contaxosu, capaz de descolonizar les tradiciones.
Rodrigo Cuevas. La gracia de la agitación folklórica presenta un conxuntu d'elementos como fotografíes, vídeos, pieces de vestuariu, oxetos ya instalaciones audiovisuales, nes que'l visitante ye un axente activu. Convidáu a dexase llevar por cada propuesta, esti tresformamientu remata cola posibilidá de compartir con Cuevas cantares, dichos o hestories contaes con «gracia»... colos que devolver a lo común esa mesma forma de facer cola que l'equipu curatorial construyó esta esposición.
Ricardo Villoria, comisariu de la esposición afirma que Rodrigo Cuevas nos convida, «al traviés del poder del tresformamientu, a paranos a pensar, dexanos llevar y esfrutar del momentu, de los nuesos raigaños, de la tradición. Un artista global xenerador de texíos sociales, que nos avera a la vida contemplativa al traviés de la so música, travesando lo tradicional pa tresformalo en contemporaneu». Pa Llorián García, tamién comisariu de la esposición, «la gracia ye l'arte de impredecir, xusto aquello que nun pueden facer nin la intelixencia artificial nin los algoritmos. Una esposición y un espaciu que convida a pensar y a divertise col públicu».