Laboral Cinemateca seleiciona trés curtiumetraxes pa distribuir en festivales
CON C DE CIENCIA Y CULTURA
Formen parte del programa de producción rexonal de curtios
22 jun 2019 . Actualizado a las 09:46 h.Los curtiumetraxes Beyond the glacier, de David Rodríguez Muñiz, Un fantasma recorre (…), de Tito Montero, y Un coche cualquiera, de David Sañudo, fueron escoyíos para formar parte del Catálogu de Curtiumetraxes de Laboral Cinemateca, un programa de promoción pa facer espardimientu y distribuir la producción rexonal de curtios en certames cinematográficos de relevancia nacional ya internacional. A la última convocatoria presentáronse 13 curtiumetraxes.
El Comité de seleición tuvo formáu por Patricia Sánchez, directora y productora de cine y miembru del Festival L´Alternativa de Barcelona; Pablo Menéndez, fundador de Marvin&Wayne, una de les más importantes distribuidores de curtiumetraxes d'España; y Óscar de Julián, un espertu en curtiumetraxe, ex direutor del Festival de Cine de Almería, programador nel Festival d'Aguilar de Campo dende 2015 y co-direutor de la revista especializada Cortosfera.es. Los espertos valoraron la calidá artística y téunica de los trabayos presentaos, la orixinalidá y la potencialidá pa ser escoyíu en festivales, amás de la representatividá de la cultura y el cine d'Asturies.
A partir d'esti momentu, Laboral Cinemateca va ocupase de la inscripción y presentación de los curtios escoyíos nos festivales más destacaos, tanto del ámbitu nacional como del internacional.