Estrelles de cine pa les nueches del branu d'Uviéu

A. I.

CON C DE CIENCIA Y CULTURA

Cine a la lluz de la lluna na Fábrica d'Armas d'Uviéu
Cine a la lluz de la lluna na Fábrica d'Armas d'Uviéu

SACU entama güei una programación qu'inclúi venti películes pa esfrutar en familia

04 jul 2019 . Actualizado a las 23:46 h.

Audrey Hepburn na Llosa; Gregory Peck, na plaza del Conceyu; Anthony Perkins na Fábrica d'Armes; Marilyn Monroe na Plaza del Fresno, los hermanos Marx en Pumarín o l'equipu de baloncestu de Campeones en Cualloto, Lluniego, Trubia o Tudela Veguín. Uviéu va enllenar d'estrelles esti branu gracies a la cuarta edición del Cine a la lluz de la lluna, la programación cinematográfica entamada pola Fundación Municipal de Cultura del Conceyu d'Uviéu al traviés de SACU (Selmana del Audiovisual Contemporaneu d’Uviéu) qu'apuesta, un añu más, por una programación pa esfrutar en familia.

 Dende güei, 2 de xunetu, al 28 d'agostu, el públicu d'Uviéu va poder ver venti películes nes 15 localizaciones del Cine a la lluz de la lluna, una más que l'añu pasáu, cola incorporación de La Florida (c/ Sotu'l Barcu) al mapa cinematográficu braniegu, qu'inclúi barrios del centru de la ciudá y otros como La Corredoria, Les Campes o Ventanielles; pueblos como Tudela Veguín, Lluniego, Cualloto y Trubia, y espacios singulares como la Fábrica d'Armes. En total, 32 sesiones de cine itinerante que, dende la so primer edición en 2016, tuvo una gran acoyida con 9.840 espectadores.

 El Cine a la lluz de la lluna empecipia güei con Audrey Hepburn y Gregory Peck en Vespa, pasiando pela eterna Roma ensin salir de la plaza del Conceyu. Vacaciones en Roma va ser la primer película del miniciclu dedicáu a la icónica actriz, qu'inclúi otros aclamaos títulos como Desayuno con diamantes (Llosa, 05.08); Charada (Pumarín, 27.08) y Sabrina (que cierra'l ciclu'l 28 d'agostu).

Hepburn nun va ser l'únicu mitu de Hollywood que s'asome a la pantalla de branu, Gene Kelly va tar na Llosa (15.07) Cantando bajo la lluvia y Gary Grant va llevar a Otero la redacción del Morning Post na deliciosa comedia Luna Nueva. Si daquién entá nun vio rise a Greta Garbo, va tener la ocasión de desfrutar cola esplosiva risada que suelta en Ninotchka, na Plaza Juan Pablo II (29.07). Y para los qu'adoren les comedies de Billy Wilder: Con faldas y a lo loco, con una Marilyn Monroe n'estáu de gracia secundada por dos inmensos Jack Lemmon y Tony Curtis (23.07, Plaza del Fresno).

La selección inclúi obres de maestros como Alfred Hitchcock, Howard Hawks, William Wyler, Stanley Donen, Hayao Miyazaki, Ernst Lubitsch, Roman Polanski, Blake Edwards, Ridley Scott, Guillermo del Toro o Wilder.

La Fábrica d'Armes va ser l'espaciu del suspense, con obres maestres como La semilla del diablo (04.07), Psicosis (18.07), Suspense (01.08) y Alien, el octavo pasajero (22.08). Nestes sesiones, la entrada ye llibre hasta completar aforu (200 sielles).

La comedia, amás de les yá mentaes, va vese reforzada polos incombustibles hermanos Marx, que van faer doblete con Sopa de ganso (Plaza Picasso, 25.07) y Un día en las carreras (Plaza del Fresnu, 12.08) y por películes actuales que lleguen al Cine a la lluz de la lluna tres un gran ésitu de taquilla y cargaes de premios, como Campeones, la sorpresa de la temporada nel cine español, o la francesa C’est la vie.

Y camudando de xéneru, los siguidores del maestru de l'animación Hayao Miyazaki y del míticu Studio Ghibli, van tener la ocasión d'esfrutar del espectáculu desbordante El viaje de Chihiro; La forma del agua y Tres anuncios en las afueras (dambes en Ventanielles, el 24 y el 30 de xunetu, respectivamente) o El asesinato en el Orient Express, de Kenneth Branagh, la última versión de la novela d’Agatha Christie.

Toles sesiones del cine a la lluz de la lluna van empezar a les 22:15 hores. Les películes van esibise doblaes, sacantes los cuatro de la Fábrica d'Armes que se van proyectar en versión orixinal.