La Universidá al traviés d'un microscopiu

ARA IGLESIAS

CON C DE CIENCIA Y CULTURA

Estudiantes d'un de los campus científicos de branu nuna de les actividaes
Estudiantes d'un de los campus científicos de branu nuna de les actividaes Universidá d'Uviéu

Más d'un cientu d'estudiantes de toa España participen nos campus científicos de branu n'Asturies

04 jul 2019 . Actualizado a las 22:01 h.

Xeoloxía, electrónica, construcción d'oxetos intelixentes o estudiu de les bases de criminalística son dalgunes de les actividaes qu'escoyeron más d'un centenar d’estudiantes de toa España pa pasar unos díes de branu n’Asturies. Son los participantes nos campus científicos de la Universidá d'Uviéu qu'empezaron esta selmana. Estudiantes de 4º de la ESO y de 1ª de Bachilleratu procedentes de 14 comunidaes autónomes.

El programa que presenta la institución académica asturiana captó l'interés de 4.790 mozos, de los que 569 elixieron el Campus Ad Futurum como primer opción. Cada estudiante participa nun proyectu científicu diseñáu por profesoráu universitariu en collaboración con docentes d'Enseñanza Secundaria y va poder conocer los principios del llabor investigador: el métodu científicu, les técniques de trabayu, el llogru y l'analís de los datos.

La Universidá d'Uviéu realiza cuatro proyectos: Paraísu Xeolóxicu, Bases Científiques de les Investigaciones Criminalísticas, Crea y programa oxetos intelixentes pa tresformar el to mundu o Imaxina un dispositivu electrónicu y constrúyilo! Los mozos yá empezaron el so aprendizaxe, ente bates de llaboratoriu, microscopios, probetas o dispositivos electrónicos.

Un programa yá clásicu na Universidá d'Uviéu ye'l rellacionáu cola criminalística, onde los mozos aprienden les técniques más modernes pa investigar l'escenariu d'un crime y comprueben que non siempres ye como se ve nes series de televisión. Este ye un de los programes nel que se combinen más disciplines, magar tamién xenera muncho interés el cursu sobro software, qu'inclúi'l diseñu ya impresión 3D. Amás de los talleres, tamién faen visites culturales y actividaes turístiques pa que los mozos d'otres comunidaes conozan la nuesa rexón.