Sabencia, la Sociedá Asturiana de les Ciencies, crea un nomenclátor col envís de normalizar l'usu de los nomes asturianos de tolos grupos de fungos, plantes y animales
05 jul 2019 . Actualizado a las 11:34 h.Abeya, esperteyu, nielda, llurganeru, ciñiplu, bilortu, raitán, fenoyu, sacavera, meruxa, carbayu, viriatu… son dalgunos de los nomes d'animales, plantes y hongos que, en munchos casos, formen parte de la nuesa vida cotidiana pero que de xuru nun conocemos pol so nome n'asturianu. Agora toos puen consultase nel Nomenclátor de los Seres Vivos en llingua asturiana de Sabencia, la Sociedá Asturiana de les Ciencies.
Sabencia naz coles mires de potenciar y esparder la cultura científica n’asturianu. Los finxos cimeros d’esti trabayu estableciéronse na recoyida de los nomes asturianos de los seres vivos, nel so estudiu, na so preservación y na so divulgación.
El Nomenclátor tien una ferramienta cola que contribuyir de manera eficaz a la normativización y normalización de la llingua asturiana. El buscador dexa restolar tola base de datos del nomenclátor pel nome del organismu n’asturianu, castellanu o inglés, siendo igualmente válidu per cualesquier parte de la pallabra o grafía qu’almita la normativa de l’Academia de la Llingua Asturiana. Tamién almite gueta taxonómica (reinu, clas, orde, xéneru y familia). El resultáu namái ufre un únicu términu referencial pa cada especie biolóxica.
Sabencia cunta con una páxina web (http://www.sabencia.net) onde amás del nomenclátor puen consultase distintos artículos científicos. Ta formada por departamentos, y anque güei hai cinco activos (botánica, zooloxía, meteoroloxía, divulgación científica y filoloxía), la sociedá ta abierta a nuevos campos del saber científicu, según el pruyir de los miembros.
Los autores del proyectu indiquen na so páxina web les razones pola que s'escoyó'l nome de Sabencia: “Por ser la pallabra asturiana que meyor describi lo que pretende ser: un llugar atecláu pol rigor científicu au axuntar saberes y asoleyar toles estayes del saber. Nesti sen va’l segundu significáu del nuesu nome que queremos ver nel acrónimu del Saber de la ciencia”.
El logotipo ye l’elefante prehistóricu de la Cueva’l Pindal, “por ser símbolu de lo que curiamos foi l’aniciu de la ciencia. Nunos tiempos nos que la maxa yá’l conocimientu empíricu taben mecíos, esti fechu revela una evolución cognitiva complexa y consciente que, col pasar de los sieglos, acabó por xebrase de lo sobrenatural y convertise en ciencia”, dicen los autores.