El Muséu de Belles Artes amuesa la xeometría y l'espaciu na obra d'Oteiza
CON C DE CIENCIA Y CULTURA
El centru espón una pieza importante nel procesu esperimental del artista y entama un taller pal domingu
08 jul 2019 . Actualizado a las 20:02 h.El Muséu de Belles Artes d'Asturies amuesa dende la pasada selmana la obra «Desocupación de la esfera. Conclusión esperimental nº2, variante», una escultura ellaborada pol artista Jorge Oteiza en 1958 que va permanecer espuesta na pinacoteca asturiana hasta'l próximu mes d'ochobre.
La obra convidada tien como oxetivu traer al Muséu de Belles Artes d'Asturies mientres un periodu averáu de trés meses distintes ya importantes obres procedentes de coleccionistes particulares o d'otres instituciones nacionales ya internacionales que contribuyan a reforzar el discursu de la colección permanente, en dellos casos porque dexen afondar n'aspeutos yá contemplaos pola colección y, n'otros, porque dexen cubrir llagunes que nella puedan detectase.
Nesta ocasión, la escultura vien arriquecer el discursu espositivu en redol a los artistes españoles n'activu a mediaos del sieglu XX, amás de completar la presencia d'Oteiza nel Muséu.
La obra, que forma parte de la Colección Liberbank, foi presentada el xueves nel Muséu, que cunta tamién con otra obra de Oteiza na so esposición permanente, «Cabeza d'Apóstol» (Basílica de Aranzazu). La catedrática d'Historia del Arte d'Uviéu, Soledad Álvarez, explicó qu'esta obra d'Oteiza, qu’agora puede vese nel centru d’arte, amuesa'l procesu esperimental del artista.
Esti domingu, día 14, a les 11:45 hores, el centru d'arte va facer un taller en redol a la obra tituláu «Construcciones. Un acercamientu a la vida y obra de Jorge Oteiza» destináu a families con neños y neñes d'ente 4 y 12 años.