Un proyectu avera al públicu'l pasáu industrial de la rexón con semeyes, vídeos y testimonios de los protagonistes
08 jul 2019 . Actualizado a las 13:40 h.Más de 300 pieces audiovisuales, semeyes y relatos retraten el patrimoniu industrial asturianu. Una plataforma online avera’l nuesu pasáu industrial al públicu dende güei al traviés de testimonios de los protagonistes y la opinión d'espertos. El proyectu, desenvueltu pola productora independiente asturiana Freews Producciones col cineasta Marcos M. Merín al frente, cuenta col sofitu de 16 instituciones y empreses, encabezaes pol Ministeriu de Cultura, el Gobiernu del Principáu d'Asturies, los conceyos de Carreño, Castrillón, Xixón, Mieres y Samartín del Rei Aurelio.
Vieyos castilletes, pozos mineros, llavaderos, maquinaria y poblaos formen la parte dedicada a la historia de la minería, pero tamién atopamos estremaos pa la industria, el tresporte ferroviario y naval, y el patrimoniu inmaterial.
La plataforma patrimoniuindustrial.com espubliza primeramente más de 300 pieces audiovisuales que retraten enclaves patrimoniales combinando tratamientu cinematográficu y rigor hestóricu, amás de los testos introductorios de 18 investigadores, más de 1.000 finxos de la nuesa hestoria industrial, semeyes, mapes de localización y más de 100 videos con testimonios de trabayadores que caltienen la memoria oral y glosarios de los distintos sectores industriales.
El proyectu, que cunta con Faustino Suárez como coordinador del área hestórica, ye la resultancia de dos años de trabayu d'un equipu integráu por 30 profesionales del patrimoniu industrial, el cine, la fotografía, la historia del arte, l'arquitectura, el diseñu, la programación web, el periodismu y el marketing online.
Los promotores aseguren que l'orixe de la propuesta ta na singularidá del patrimoniu industrial asturianu y na necesidá de construyir una imaxe propia, “ensin señardaes nin llamentos sinón enfocaos nun legáu que, tres dos sieglos de industrialización y tresformamientu del territoriu y les sos xentes, fálanos del presente pa entruganos sobro'l futuru”
Los conteníos de la plataforma van actualizase costantemente con nueves semeyes d'enclaves, entevistes y secciones, y van distribuyise en dos idiomes nos perfiles en redes sociales de patrimoniuindustrial.com. L'oxetivu ye algamar los 500 recursos patrimoniales retrataos audiovisualmente antes de final d'añu.