Tres la buelga del pterosauriu de Tazones

L'equipu científicu del Muséu del Xurásicu d'Asturies rescata les icnites del reptil volador de cinco metros de nala qu'habitó la zona fai 150 millones d'años

Buelgues del pterosauriu
Buelgues del pterosauriu

L'equipu científicu del Muséu del Xurásicu d'Asturies (MUXA), formáu polos xeólogos José Carlos García-Ramos y Laura Piñuela, recuperó ayeri un bloque d'arenisca xurásica con buelgues de pterosaurios (reptiles voladores), nos cantiles de Villar (Tazones), en Villaviciosa, cola ayuda del helicópteru de Bomberos del Serviciu d'Emerxencies del Principáu d'Asturies. El SEPA realizó esti serviciu de calter escepcional dáu'l valor de la pieza y el riesgu de que suma. 

Les buelgues de pisaes fósiles o icnites de pterosauriu caltiénense como contramoldes na base d'un bloque sueltu d'arenisca. Fueron afayaes pol equipu d'investigación del MUXA nos cantiles de Villar (Tazones), mui cerca de la llende d'esta parroquia cola d'Oles, en Villaviciosa, al este de la Punta del Olivo.

Pol magníficu caltenimientu de les buelgues, pertenecientes tantu a les manos como a los pies, apréciense diversos calteres específicos. Les icnites de los pies son triangulares con cuatro deos llargos y estrechos terminaos en garres, presenten almadines dixitales y nalgunes d'elles les impresiones de les escames de la piel. Les buelgues de les manos tienen trés deos qu'aumenten de tamañu del primeru al terceru, dalgunes amuesen les impresiones de les garres y otres les evidencies de les membranes interdixitales qu'esistíen ente los deos. Estes morfoloxíes son atribuyibles a un pterosauriu que flotaba parcialmente na vera d'un ríu, posiblemente a la gueta d'alimentu. Les dimensiones de les buelgues prueben que se trataba d'un reptil aláu de considerable tamañu pal Xurásicu Cimeru, unos 5 metros d'un estremu de la nala al otru.

El bloque d'arenisca que contien les icnitas pertenez al conxuntu de roques xilizes de la segunda metá del Xurásicu que conocemos como Formación Llastres, aniciaes cuando l'antigua mariña d'Asturies, muncho primero del desenvolvimientu de los actuales cantiles, taba apoderada por sistemes deltaicos que desaguaben nun mar interior, fai agora unos 154 millones d'años.

Esta superficie estrayida con buelgues de pterosaurios ye la continuación d'otres yá recuperaes va años y que s'atopen depositaes, y una d'elles espuestes, nel Muséu del Xurásicu d'Asturies. El númberu d'icnites, el so tamañu y l'escelente caltenimientu que presenten fai d'esti xacimientu'l más completu y meyor calteníu a nivel mundial.

Amás, na mesma operación púdose estrayer otru bloque d'arenisca con un rastru perbién calteníu nun limúlidu d’un cámbaru, conocíu popularmente como cangrejo cacerola o cangrejo herradura, un artrópodu emparentáu más colos arácnidos que colos crustáceos.

La Directora Xeneral de Patrimoniu Cultural, Otilia Requejo; la conceyala de Cultura del Conceyu de Villaviciosa, Lydia Espina;y el Conceyal de Puertos, Pesca, Playes y Mediu Ambiente de Colunga, Jesús Menéndez, tuvieron presentes na recuperación d'esta pieza.

Comentarios

Tres la buelga del pterosauriu de Tazones

Cola ayuda de