Sabencia, un proyectu pa impulsar la Sociedá Asturiana de les Ciencies, axunta nuna base de datos el nome n'asturianu de más de 3.000 especies
16 jul 2019 . Actualizado a las 11:49 h.Too entamó d'una forma casual, nun intentu de normalizar el nome n'asturianu de delles especies de plantes, va más de cuatro años. Un grupu d'amigos xuníos por trés pasiones: la ciencia, la divulgación y l'asturianu apurrieron lo que caún podía na so respectiva especialidá pa dar forma a un nomenclátor de los seres vivos n'asturianu. El trabayu, cola base informática de softastur (software llibre n’asturianu), ve agora la lluz de la mano de Sabencia, un llugar d'alcuentru pa la ciencia n'asturianu.
Rubén Fernández y Bertu Ordiales son dos de los promotores d'esti proyectu, que comparten con Pelayu Valduvieco, Guillermo César Ruiz y Llorián Cueto. Ente toos trabayen en disciplines como botánica, zooloxía, meteoroloxía, filoloxía y divulgación científica.
Nos últimos años realizaron distintes publicaciones, dalgunes como nel casu de Rubén Fernández, cola Academia de la Llingua Asturiana, y traten de combinar el rigor científicu con temátiques d'interés xeneral que tamién puedan sirvir na vida cotidiana, como trabayar l'análisis estadísticu y la probabilidá con sopes de lletres, analizar rutes de senderismu dende'l puntu de vista científicu o falar sobre la meteoroloxía popular d'Asturies.
Sabencia inclúi dalgunos artículos y el nomenclátor de los seres vivos, que cunta yá con una base de datos de 3.000 especies ente animales, plantes y hongos col so nome n'asturianu. “Ye una ferramienta pa la xente, en xeneral, y tamién pa profesores”, afirma Rubén Fernández, que confía en qu'esti nuevu portal web científicu seya'l xerme d'una Sociedá de Ciencies n'Asturies, cola llingua como filo conductor y abierta a toles persones implicaes n’esparder el saber.
Amás d'afitar el nome de la especie, les variantes dialectales, les razones poles que s'escoyó, inclúiese l'allugamientu, los conceyos onde ta presente. “El nuesu oxetivu ye poder contribuyir tamién a la enseñanza con materiales didácticos, que puedan ser útiles nel aula”, afirma Bertu Ordiales. Dambos coinciden en que Sabencia naz, amás, cola idea de lluchar contra la seudociencia y fomentar la divulgación del saber, de la ciencia, n'asturianu.
Ye un pasu más nesti momentu nel qu'en tolos ámbitos se fala de la oficialidá del asturianu. Ye reconocíu qu'esiste una xeneración de la cultura n'asturianu qu'espuntó nos últimos años con gran calidá na lliteratura, la música y les artes, pero tamién esiste un interés creciente nel ámbitu científicu por divulgar n'asturianu. “Hai un puntu d'inflexón y esti ye un momentu de nun dar marcha atrás, de romper colos estereotipos y de ver qu'hai un relevu xeneracional y que los mozos tán interesaos n'espresase y comunicase n'asturianu en tolos ámbitos”, aseguren.