Les nubes dexáronnos otra vegada n'Asturies ensin eclipsi de lluna

Otra vegada la nueche del 16 de xunetu, por mor la nubosidá, los asturianos quedamos ensin esfrutar d’una de les efemérides astronómiques que mayor llamamientu tien ente’l públicu xeneral, la eclipsi de lluna. Nesti casu malapenes foi visible pola entrada d’una masa nuboso a lo llargo la tarde, ya que nos dexó una capa de nubes altes.

Esti fenómenu lleva ablucando la humanidá desque foi consciente de los cambios qu’acaecen en cielu nocherniegu. Según paez, yá los pintaron nos murales de les cueves los europeos del paleolítico. Nos que la eclipsi apaez representada n’escenes de fieres (lleones, llobos...) cazando bisontes, venaos ya otres especies con cuernos que venceyen cola lluna (a los interesaos recomiendo-yos lleer la obra Los símbolos de la prehistoria de Raquel Lacalle). Per munchos sieglos los humanos nun atopamos más qu’esplicaciones máxiques ya sobrenaturales al fenómenu. Foi Aristarco de Samos (310 a.C-250 a. C.) el primeru n’atalantar correutamente l’enquiz del fenómenu. Nel so modelu (perasemeyáu al actual) la tierra xira alredor del fueu central (el sol), ya la lluna orbita alredor de la tierra. Partiendo d’esa conceición foi quien a deducir que les eclipsis apaecen cuando la lluna pasa al traviés de la solombra proxectao pola tierra ya que les eclipsis solares soceden cuando la lluna s’interpón ente’l sol ya nós. Aristarco ya toles sos idees nun fueron tomaos en serio por nengún de los sos coetáneos, fieles siguidores de Platón, qu’atesteraben que la tierra yera’l centru de l’universu. La esplicación d’Aristarco escaecióse, ya nun volvió ser considerada hasta’l refugu del modelu xeocentrista, nel Renacimientu, cola llegada del modelu copernicanu.

Como yá diximos una eclipsi de lluna socede cuando la tierra se pon ente'l sol ya la lluna, xenerando un conu de solombra qu'escurez la lluna. Pa ello la tierra, el sol ya la lluna tienen de tar alliniaos de cuenta que la tierra tape la lluz del sol (por eso estes eclipsis namás que se producen con lluna enllena). Nes ocasiones nes qu’esta solombra anubra tol discu de la lluna falamos d’una eclipsi total, mentanto que nes eclipsis parciales la solombra tapa namás qu’una parte. Nel casu de del día 16 de xunetu afeutó alredor del 65% del discu llunar. Esiste otru tipu d’eclipsi, la eclipsi penumbral, nel que la lluna queda tapada pola solombra esterior de la tierra, polo que namás queda en penumbra.

Foi una pena qu’una vegada más Asturies (ya’l Cantábricu enteru) quedara ensin poder observar un fenómenu tan curiosu.

(*) Rubén Fernández ye miembru de SABENCIA, Sociedá Asturiana de les Ciencies

---

---