La cultura sidrera da un nuevu pasu pa ser patrimoniu de la humanidá

LA VOZ

CON C DE CIENCIA Y CULTURA

Un actu echando sidra dientro de la campaña sobre Patrimoniu de la Humanidá.
Un actu echando sidra dientro de la campaña sobre Patrimoniu de la Humanidá. Alberto Morante

El Principáu formaliza la propuesta, unviando la documentación xustificativa al Ministeriu de Cultura, pa que tea na llista representativa de la Unesco

20 jul 2019 . Actualizado a las 09:14 h.

El Principáu d'Asturies formalizó la propuesta, unviando la documentación xustificativa al Ministeriu de Cultura, pa que la cultura sidrera tea na llista representativa de la Unesco. Lo que daría pasu a la posibilidá de ser declarada patrimoniu cultural inmaterial de la humanidá.

El Principáu completó d'esta manera la fase técnica del procesu que fixo nel últimu añu'l comité director pa la ellaboración de la candidatura. La candidatura mentada ta dirixida poles conseyeríes d'Educación y Cultura y Desarrollu Rural, y ta apoyada polos responsables de la Denominación d'Orixe Protexida (DOP) Sidra d'Asturies. Nel comité participaron antropólogos, historiadores, especialistes nel mundu de la madera y técnicos de l'Alministración.

Na documentación técnica, apurrida pol Principáu, describióse la cultura sidrera asturiana y los sos elementos constitutivos y identitarios. El documentu inclúi tol procesu d'ellaboración de la sidra, dende'l plantíu de pumares al embotelláu, la posterior comercialización o'l consumu domésticu.

Amás el documentu, que considera la sidra "ún de los principales iconos d'Asturies", incidió nel respaldu social grande que la candidatura tuvo nel Principáu y l'intensu procesu de participación ciudadana qu'acompañó a la preparación de la propuesta.

Per otru llau el trabayu esplica que la sidra configura una cultura inmaterial "xenuina", na que tienen cabida manifestaciones artístiques (música, pintura, lliteratura...) colos sos propios "rituales" y normes internes escrites y non escrites. La candidatura recoyó más de 20.000 firmes d'apoyu.