Offmothers gana'l premiu Muséu Barjola col proyectu «Cola casa a cuestes»
CON C DE CIENCIA Y CULTURA
El trabayu ta centráu en desfacer la identificación histórica de la muyer col llar y ufierta una nueva mirada sobre la esperiencia de ser muyer y artista
27 jul 2019 . Actualizado a las 13:42 h.El proyectu Cola casa a cuestes, del colectivu Offmothers, foi galardonáu col Premiu Muséu Barjola que concede'l Gobiernu d'Asturies y al qu'aspiraben na fase final de la so tercer edición una ventena de trabayos.
El xuráu, presidíu pol viceconseyeru de Cultura y Deporte, Vicente Domínguez, y formáu polos directores del Pentágonu del Arte, destacó la “propuesta interdisciplinar” del proyectu, centráu en desfacer la identificación histórica de la muyer col llar y qu'ufierta una nueva mirada dende distintes perspectives pa analizar la esperiencia de ser muyer y artista”.
Cola casa a cuestes ye, según el xuráu, “un proyectu con una llínia d'investigación estrechamente venceyada al arte feminista” y va cuntar con una esposición específica pa la capiella de La Trinidá al traviés de distintes pieces producíes pol colectivu”. La propuesta axunta instalaciones, dibuxos, fotografíes, pieces sonores, vídeu y perfomance.
El colectivu Offmothers ta integráu poles artistes María Elena de la Puente (Uviéu, 1969), Susana Carro (Mieres, 1971), Natalia Pastor (La Pola Llaviana, 1970), Roxana Popelka (Xixón, 1966), Gema Ramos (Uviéu, 1969) y Eugenia Tejón (Moreda d'Ayer, 1968).
El premiu ta dotáu con 5.000 euros y l'edición del catálogu. Nes dos primeres ediciones fueron galardonaos Carlos Suárez, por Cita cola historia, y Cristina Bustu, por Antimapping.