El grupu d'investigación LLABOR va escavar un túmulu y reconstruyir una cabana neolítica en Vigaña dientro d'un taller de branu
27 jul 2019 . Actualizado a las 13:26 h.El Grupu d'Investigación LLABOR va realizar distintes actividaes didáctiques rellacionaes cola Historia y l'Arqueoloxía destinaes a tolos públicos los díes 26 y 27 de xunetu en Vigaña (Balmonte). Nel marcu del proyectu ConCiencia Histórica, l'oxetivu ye introducir al alumnáu nel métodu científicu al traviés del estudiu arqueolóxicu afondando na rellación ente les entrugues históriques y científiques y el patrimoniu cultural. Too ello nun incomparable marcu rural que se va convertir nel escenariu pa la realización de les actividaes.
El vienres pela tarde va tar dedicáu a los xuegos tradicionales y a la tradición oral. Con Carlos Suari, los asistentes van participar en dellos xuegos d'Asturies, especialmente'l más habitual en Vigaña qu'aínda se sigue practicando: los bolos. Otra parte va xirar en redol a la música y los bailles, repasando l'ampliu repertoriu de la contorna con Ambás y Ramsés Iglesias, que van enseñar dellos bailles.
El día 27 va tar dedicáu a la historia y l'arqueoloxía, combinando l'usu de la información histórica adquirida na escavación arqueolóxica, los métodos d'investigación histórica y la conocencia de les práctiques tradicionales coles mires de construyir conocencia histórica ente toos.
Van volver a entamar los trabayos na cabana neolítica. Cola collaboración de la mocedá y la vecindá, van tratar de reparala pa reconstruyir cómo sería una casa d'esa dómina. Coles mesmes, como afirma la profesora Margarita Fernández Mier, "a los pequeños lo que más-yos emociona ye la escavación. L'actividá realizada esta primavera escavando nel monasteriu de Lapedo foi una de les meyores esperiencies que vivió'l nuesu equipu d'investigación. Pa dar continuidá a esa molición, vamos escavar un pequeñu túmulu cercanu a la nuesa cabana neolítica". Amás, van estudiar los restos qu'atoparon na escavación con un llaboratoriu nel que se van reconstruyir pieces de cerámica pa darréu realizar los modelos 3D de les pieces y los dibuxos.
Como a partir d'un determináu momentu históricu, los historiadores yá cunten con información escrita, en distintos soportes, "nel nuesu scriptorium los pequeños van poder facer práctiques de distintos tipos d'escritures y averase a los misterios de la historia de la mano d'auténticos documentos antiguos", señala la profesora Fernández Mier. El proyectu va caltener una de les mayores tradiciones: facer pan d'escanda, empanaes y bollos duces, "arroxaremos el fornu", pudiendo toes y tolos asistentes participar d'esta actividá.
A lo llargo d'estos años, l'equipu de la profesora Fernández Mier convirtió Villanueva (Santo Adriano) y Vigaña (Balmonte) en dos llaboratorios nos que decodificar la filiación histórica de los sos paisaxes y entender el so procesu de formación dende'l neolíticu hasta los nuesos díes. Les ocho campañes d'intervención arqueolóxiques sacaron a la lluz afayos d'importancia, pero sobremanera apurrieron un cúmulu d'información que dexa reconstruyir la vida y los procesos de territorialización del paisaxe de les comunidaes rurales.