El ciclu Cine y Sable va proyectase na segunda quincena d'agostu
15 ago 2019 . Actualizado a las 05:00 h.Cine y sablera son dos aficiones que pueden conxugase en Verdicio (Gozón). El colectivu Avilés Acción ruempe fronteres y mientres la segunda quincena d'agostu hai programáu un curiosu cartelu con dos películes selmanales que se van proyectar nel chiringu de Les Dunes, a les diez de la nueche.
El denomináu ciclu Cine y Sable yá empezó anueche cola proyección de la oscarizada Three Billboards Outside Ebbing, Missouri. Mientres el restu de la temporada, va poder esfrutase de llargumetraxes tolos miércoles y los vienres. La entrada ye gratuita pero pueden acutase meses pa cenar.
El director d'Avilés Acción y programador d'esti ciclu, Javier Mediavilla, muéstrase ilusionáu con esti proyectu, «por collaborar con un espaciu tan fuera de lo común, como ye'l chiringu de Les Dunes, yá que lu llegaron a denominar como espaciu cultural, pola estensa programación cultural qu'ufierta». Amás ta contentu por romper fronteres «y poder proyectar nun marcu como ye la sablera de Verdicio ye un verdaderu regalu pa toos».
La programación d'agostu sigue mañana vienres, 16, Young Frankenstein. El miércoles, 21, va poder esfrutase d'Into the Wild y el vienres, 23, del clásicu Sunset Boulevard. Cola cercanía del mar, el miércoles 28, vas poder tremar de mieu con Tiburón, y el vienres 30, desencaxar el quexal con Airbag.