A diferencia del clima que ye un tema recurrente en cualesquier estación del añu n’Asturies, les picadures de mosquitu sonlo esencialmente nel branu. Nun hai naide que nunca sintiera esi pruyimientu insaciable na piel que pide a glayíos una intervención ungular. Pero, al facelo y sentir un aselecer prestosu efímeru, da pasu aína a una arrepentida engafentadura mayor.
Les mosques, mosquitos y tabanos pertenecen al orde Diptera. Constituyen ún de los mayores órdenes d’inseutos con alredor de 100.000 especies descrites. Embaxo la so apariencia de seres simplemente molestos son probablemente’l taxón más agresivu de toos, con una importancia económica y sanitaria incuestionable. La carauterística más identificativa del orde ye la posesión d’un par d’ales y, amás, d’un par d’halterios, que son dos ales modificaes en forma de martiellu pequeñu qu’oscilen rápidamente permitiendo a la mosca a controlar el vuelu y emitir el reconocíu y típicu zumbíu d’estos organismos. Esisten especies predadores, detritívores o saprófagues (comen materia en descomposición), coprófagues (comen escrementos) y necrófagues (comen materia muerto), pero lo más temible d’esti grupu ye la so capacidá como vectores o tresmisores de patóxenos infeiciosos (bacteries, virus, protozoos y guxanos). En función del so aparatu bucal podemos estremar a grandes rasgos les dos víes peles que podemos ser afeutaos polos dípteros nel nuesu territoriu, anque siempre con gran potencialidá.
Nos individuos con boca chupadora la situación más temible ye la que pudiera derivar de la esposición d’una simple lesión dermatolóxica a estos organismos. Dalgunes especies suerben el sudor humanu, esputos, orín, exudaos de firíes y, en xeneral, too tipu de desechos orgánicos, como la mosca doméstica (Musca domestica) o otres especies como Sarcophaga carnaria, Lucilia sp, Callihora sp, etc. Pudiera dase fácilmente la situación qu’ente una simple firida o mancadura, el pruyimientu per se de la mesma incitase al rascáu y crease una discontinuidá na piel colos correspondientes exudaos. Esto atrayería a munchos dípteros como fonte nutricia y podría conllevar a una gafura más grave, a la so infeición y, en casu de complicación, a mui diferentes tipos de dolencies por ser portadores mecánicos o pasivos de numberoses enfermedaes. Por esti motivu, siempres ye de vital importancia la ocultación énte les mosques de cualquier parte corporal.
La otra vía de contautu con dípteros ye con aquellos que tán dotaos de boca picadora, como ye’l casu de los hematófagos y que son el motivu del artículu. L’hábitu hematófagu, alimentación por succión de sangre, suel ser esclusivu de les femes, puesto que necesiten un aporte enerxéticu considerable pal alimentu de los güevos y garantizar la puesta de la siguiente xeneración. Los machos, polo xeneral, son únicamente fitófagos (alimentación per succión de líquidos vexetales) anque tamién hai especies cola boca atrofiada, nun pudiendo inxerir alimentu dalu.
Magar que la secuencia d’una picadura de dípteru ye siempres la mesma, el resultáu final pue evolucionar per diferentes caminos conforme a lo que vamos ver darréu. Cola punción na nuesa piel por parte de les pieces bucales del inseutu, ésti vierte al torrente sanguíneu un conxuntu d’enzimes qu’ayuden a la so dixestión, anestesia ya incluso necrosia. L’animal suerbe’l sangre y escapa. Hai munches vegaes que’l dolor de la picadura suel alertanos de la so presencia y fraya la secuencia anque, gracies a eses sustancies, munches otres vegaes les picadures pasen desapercibíes dafechu y namás nos decatamos d’elles cuando trescurrió un tiempu considerable. Si la fema algama’l so oxetivu y absorbi’l suficiente sangre ensin ser detectada garantizará alimentu pa la siguiente xeneración. Si debe escapar por reaición de la víctima deberá esponese nuevamente a una otra punción.
El momentu clave nesta secuencia ye’l de la inoculación d’enzimes nel sangre de la víctima. Dicha inoculación faise dende les glándules salivales del dípteru, lo que representa un seriu riesgu pa la salú del receptor. Si l’inseutu absorbió sangre anteriormente d’un animal encetáu por una enfermedá (provocada por virus, nemátodos, bacteries o protozoos), ye dable que tamién absorbiera microorganismos patóxenos. Esta absorción realízase al tubu dixestivu, pero gracies a la evolución de los ciclos biolóxicos puen acabar emigrando hasta les glándules salivales, onde s’acumulen y convierten al dípteru en portador. Al inocular a una nueva víctima, xunto colos enzimes arramaos al torrente sanguineo van tamién microorganismos patóxenos, lo que permite la so fácil difusión. Esta vía de tresmisión ye terriblemente exitosa, afeutando a cientos de millones de persones tolos años (cólera, paludismu, chas, dengue, filariasis, etc) en tol planeta.
Les especies presentes n’Asturies nun son portadores de nengún patóxenu, polo que debemos tar tranquilos. La picadura pue pruyir o llegar a engafentase, pero raramente evolucionar nun cuadru clínicu más complexu. Sicasí, col cambiu climáticu yá s’atoparon mosquitos del xéneru Aedes, vectores de les enfermedaes arriba mentaes y colos que deberíamos dir familiarizándonos a reconocelos.
*Bertu Ordiales, ye miembru de SABENCIA, Sociedá Asturiana de les Ciencies.