Una campaña de crowdfunding trata d'axuntar fondos pa pagar a los arqueólogos y a los restauradores y afayar el pasáu de Les Regueres
23 ago 2019 . Actualizado a las 05:00 h.Precisen a lo menos 15.000 euros, anque la cantidá óptima sedríen 21.000. Endagora, namái recaldaron 10.300. L'asociación d'amigos de la Villa romana de San Martín de La Estaca, creada polos vecinos de Les Regueres y l'equipu investigador al envís de promocionar, investigar y espublizar esti xacimientu arqueolóxicu, abrió una campaña de crowdfunding pa consiguir los fondos económicos pa siguir cola escavación. L'oxetivu consiste n'afondar na investigación arqueolóxica y asoleyar el segundu mosaicu romanu descubiertu.
Con esos 21.000 euros podría contratase a un equipu de cuatro arqueólogos que trabayaría un mes p'afayar esi mosaicu y tamién les parees de los cuartos, amás de financiar la xera de dos restauradores que se van dedicar a les pintures parietales del mosaicu y a recomponer les posibles ausencies.
Les escavaciones arqueolóxiques feches nel 2018 afayaron la esistencia d'un segundu mosaicu en La Estaca. Dende esi momentu, los vecinos amosaron gran interés por siguir colos trabayos pero facíen falta recursos. Los impulsores d'esta campaña de crowdfunding esplicaron qu'esiste un gran interés social y qu'esto se demuestra col sofitu que recibieron en redes sociales. Los dos hastags pensaos pa espublizar el so llabor (hashtag #apoyomosaicodelaestaca y #sofitomosaicudelaestaca) cuntaron con una bayura d'interacciones. Otru exemplu d'esi interés ye, precisamente, la creación de l'asociación d'amigos de la Villa romana de San Martín de La Estaca.
Los oxetivos que se marcaron son tanto sociales como científicos. Quieren escavar el mosaicu romanu, el cuartu alcontráu n'Asturies, lo que va ayudar a conocer la romanización del mediu rural na rexón y a documentar y conocer la entidá de les ruines esistentes nesti xacimientu de Les Regueres.
Detrás d'esta campaña alcuéntrense vecinos de Les Regueres, Llanera y Uviéu, munchos d'ellos integrantes d'asociaciones culturales. Pela so parte, l'equipu arqueolóxicu ta formáu por siete espertos que yá participaron en bien de campañes d'escavación, dientro y fuera d'España. Na so trayectoria, cunta l'asociación de La Estaca, destaquen les sos participaciones en xacimientos romanos como Complutum, Chao Samartín, Termes Romanes de Valdunu, Villa romana de Veranes, Villa romana de Priañes, Ampurias, Via romana de La Mesa, Vía Romana de La Carisa o La Fonte Romana de la Rúa n'Uviéu.
Hasta'l momentu consiguieron la implicación de 103 collaboradores desinteresaos que donaron esos 10.300 euros. Queda dalgo más d'un mes pa sofitar esta campaña y 11.000 euros por recaldar.