«Intocables» aporta al teatru Jovellanos accesible pa tolos públicos

Les funciones van tener sotituláu, audiodescripción, soníu amplificáu y bucle magnéticu

Jimmy Roca y Roberto Álvarez, protagonistas de «Intocables»
Jimmy Roca y Roberto Álvarez, protagonistas de «Intocables»

Redacción

«Intocables» aporta al teatru Xovellanos accesible pa tolos públicos. Les funciones van tener sotituláu, audiodescripción, soníu amplificáu y bucle magnéticu. Les entraes tan disponibles en www.teatrojovellanos.com y en taquilla.

Un aristócrata ricu tres un accidente queda tetrapléxicu y contrata como curiador a un xoven marxinal acabante de salir de la cárcel (n’otres pallabres, la persona menos indicada pal trabayu). Cansáu de curiadores que lu traten con piedá o condescendencia, lo que-y gusta d’él, al contrario, ye que nun-y tien compasión dala.            

Xuntos van a mecer a Vivaldi y la música rap, la fala elegante y la xíriga caleyera, los paxellos caros y los pantalones de chándal. Dos mundos que choquen pa terminar por entendese. Dambos dos van atopar nel otru non lo que deseen, sinon lo que precisen daveres. Al igual que los capítulos d’un llibru, les esperiencies que comparten creen una amistá indixebrable, pesie a les crítiques o la incomprensión de familiares y amigos. Devuelve-yos asina aquella pasión pola vida qu’escaecieren y la necesidá de compartila con daquién que sepa apreciala y aceptate colos tos defeutos y virtúes. Nel camín, dambos dos texen una rellación que va acuyá d’un alcuerdu llaboral, hasta convertise en collacios indixebrables. Una amistá tan improbable ya inesperada, como definitiva. Y de la oposición ente ún y otru, de la so convivencia escéntrica, xurde la comedia.

Teatru accesible

Les funciones, que van celebrase los díes 30 y 31 d’agostu a les 20:30 nel teatru Xovellanos de Xixón, son accesibles y van tener sotituláu, audiodescripción, soníu amplificáu y bucle magnéticu.

El proyeutu Teatru Accesible tien l’envís de crear una ufierta cultural abierta y accesible pa tolos públicos. Esti proyeutu ta promovíu por Fundación Vodafone España, el centru de rehabilitación llaboral Nueva Vida y la empresa teunolóxica Aptent Soluciones.

Valora este artículo

4 votos
Tags
Comentarios

«Intocables» aporta al teatru Jovellanos accesible pa tolos públicos