L'ensayu «del periodista Damián Barreiro, ganador del Premiu d'Ensayu Máximo Fuertes Acevedo, acaba de llegar a les llibreríes
03 sep 2019 . Actualizado a las 11:50 h.L'ensayu «Asturploitation», del periodista Damián Barreiro y ganador del Premiu d'Ensayu Máximo Fuertes Acevedo del Gobiernu asturianu, acaba de llegar a les llibreríes. Esta obra céntrase n'analizar el pasáu y presente del sector audiovisual al traviés del cine d'esplotación y les producciones en llingües minoritaries.
«Asturploitation» ye'l resultáu del xuegu de palabres qu'asturianiza'l blaxploitation americanu --el cine de minoríes negres-- y cola que l'autor estudia la situación del audiovisual n'asturianu, comparándolo con otros subxéneros cinematográficos a lo llargo del mundu y con especial referencia a los sectores audiovisuales n'otres llingües del Estáu español.
Amás, según señalen dende Ediciones Trabe, l'autor fai una propuesta estratéxica «pa da-y impulsu y puxu a un sector bien importante pa que la xente asturfalante, y con ello toa Asturies, se sienta representao na pantalla».
Damián Barreiro Maceiras (A Estrada, Pontevedra, 1984) ye periodista y ganó nel añu 2013 el Premiu Fierro Botas del Conceyu de Xixón con «L'espeyu onde miranos: televisiones de proximidá n'Europa Occidental y procesos de recuperación identitaria». Un añu depués recibió'l Máximo Fuertes Acevedo con «Caleya Sésamu: el papel de la televisión na tresmisión interxeneracional d'una llingua».
Tamién foi merecedor del Premiu d'Investigación Sociollingüística qu'entama l'Academia de la Llingua Asturiana y tien publicáu l'ensayu infantil «Yo, la to llingua», onde l'idioma asturianu cuenta en primer persona la so historia; informó Europa Press.