El quintu centenariu inclúi un ciclu de llectura con escritores caribeñes como protagonistes
04 sep 2019 . Actualizado a las 05:00 h.El final de los actos conmemorativos del quintu centenariu de Pedro Menéndez yá ye una cuenta atrás. La esposición que repasa la vida del «Adelantáu de la Florida» va terminar el día 15 de setiembre, na Casa de la Cultura d'Avilés. Ye una amuesa que recueye aspeutos pa conocer la vida y obra del conquistador, los sos entamos como novel navegante, los servicios emprestaos a la corona española, la conquista de La Florida, la fundación de San Agustín de la Florida, primer ciudá d'orixe européu de los actuales Estaos Xuníos d'América, y tamién la so faceta de científicu y los sos descubrimientos náuticos.
Pero dientro d'estes actividades, que protagonizaron el branu na ciudá, inclúise tamién un nuevu ciclu del Club de Llectura «Una habitación propia» que va llevar por títulu «Cartografía lliteraria del Caribe: «La voz de les narradores 500 años dempués».
Asina van lleese a partir del próximu 16 de setiembre obres de Maryse Condé, Jamaica Kincaid, Wendy Guerra, Lydia Cabrera, Rita Indiana y Ana Lydia Vega.
Van ser cuatro xuntes, que van tener llugar na segunda planta del Palaciu de Valdecarzana, de magar les 18:00 hores, y pa participar ye preciso inscribise y lleer el llibru que va ser oxetu del alcuentru.
Tamién el 15 de setiembre va rematar otra esposición sobre Pedro Menéndez, la qu'acueye'l centru Sociocultural de Los Canapés, entamada pol Conceyu d'Avilés y el Muséu d'Historia Urbana de la ciudá. Inclúi diez paneles nos que se recueye la vida de Pedro Menéndez, el so contestu históricu, la realidá del otru llau del Atlánticu, les meyores técniques que desenvolvió y l'alcordanza que caltien n'Avilés como llugar de memoria.