Los gallardones de la escena asturiana van entregase en xineru en Xixón
18 sep 2019 . Actualizado a las 05:00 h.El teatru asturianu vuelve ponese de gala y prepara una nueva edición de los Premios 0h! nuna ceremonia que va celebrase'l próximu 31 de xineru nel Teatru Xovellanos de Xixón.
Los actores, actrices y autores del teatru asturianu van xubir al escenariu, non pa representar les sos obres, sinón para recoyer los gallardones decidíos pol xuráu.
Los Oh! tienen doce categoríes, once d'elles a concursu: Meyor Espectáculu, Meyor Espectáculu pa la Infancia, Meyor Dirección, Meyor Intérprete Masculín de Teatru o Danza, Meyor Intérprete Femenina de Teatru o Danza, Meyor Autoría o Coreografía, Meyor Producción, Meyor Composición Orixinal o Espaciu Sonoru, Meyor Escenografía o Espaciu Escénicu, Meyor Indumentaria o Caracterización y Meyor Diseñu d'illuminación. El gallardón fuera de competición, el Premiu Oh! d'Honor, va ser otorgáu pola asamblea d'ESCENASTURIAS a la persona o entidá que destaque pola so relevancia o trayectoria profesional.
A estos gallardones van poder presentase les empreses productores o compañíes profesionales de danza y teatru d'Asturies y tolos espectáculos van tener que s'exhibir n'Asturies y estrenase ente'l 1 de setiembre de 2017 y el 31 d'ochobre de 2019.
El plazu de recepción de candidatures yá empezó y remata'l próximu 31 d'ochobre.
Los espectáculos premiaos dende la primer edición fueron los siguientes: Crecer (El Callejón del Gato), Vientos del mar (Higiénico Papel Teatro), Carne de gallina (Teatro del Cuervo), En un lugar de la galaxia (Teatro del Cuervo), Mariana Pineda (Teatro del Norte), El viaje de Covaletti (Higiénico Papel), Después de cortar el césped (Zig Zag Danza), Nora (Factoría Norte), Folías (Factoría Norte), Un lugar en tu corazón (Teatro del Cuervo y José Luis Lago Producciones), Doctor Fausto (Higiénico Papel Teatro), Cuento del día y de la noche (Producciones Quiquilimón), Almaelectra (Factoría Norte), Una casa (Higiénico Papel), Elektra (Teatro del Norte), El sueño de una noche de verano (Teatro del Cuervo), Como ceniza blanca sobre una hoguera (La Tejedora de Sueños), El viaje de Dorothy (Fantastique Company), Helladia o los cuerpos de Atalanta (Zig Zag Danza) y La loca historia de Frankenstein (ACAR Teatro del Mundo).